Soner Kılıç: Azərbaycan Türk dünyası ilə Qafqaz arasında mühüm turizm körpüsüdür
Bakı, 17 sentyabr, AZƏRTAC
Qafqazda yerləşən yeganə türk dövləti kimi Azərbaycan iki böyük coğrafiya arasında tarixi, mədəni və iqtisadi əlaqələrin inkişafında mühüm rol oynayır. Bu xüsusiyyət ölkənin turizm potensialının genişləndirilməsi və beynəlxalq turizm marşrutlarının inkişafı baxımından da xüsusi əhəmiyyət daşıyır.
Bu fikirləri AZƏRTAC-a açıqlamasında türkiyəli turizm eksperti Soner Kılıç bildirib.
Ekspert qeyd edib ki, Azərbaycanın coğrafi mövqeyi ölkənin turizm imkanlarını artıran əsas amillərdən biridir. Onun sözlərinə görə, Azərbaycan həm Xəzər dənizinə çıxışı, həm zəngin təbiəti, həm də qədim tarixə və çoxşaxəli mədəni irsə malik olması ilə fərqlənir.
“Azərbaycan həm Türk dünyasının bir parçasıdır, həm də Qafqaz ölkəsidir. Qafqazda yerləşən yeganə türk dövləti olması Azərbaycanın özünəməxsus xüsusiyyətidir. Bu mövqe ölkəyə Türk dünyası ilə Qafqaz arasında mühüm əlaqələndirici rol oynamaq imkanı verir”, - deyə Soner Kılıç vurğulayıb.
O bildirib ki, Azərbaycan və Türkiyə arasında mövcud olan tarixi və mədəni bağlar turizm sahəsində əməkdaşlığın inkişafı üçün əlverişli zəmin yaradır.Digər türk dövlətləri ilə əlaqələrin genişlənməsi Azərbaycan turizminin yeni bazarlara çıxışını sürətləndirə bilər.
Soner Kılıçın sözlərinə görə, Türk dövlətləri arasında turizm əlaqələrinin inkişaf etdirilməsi yalnız turist sayının artırılması baxımından deyil, xalqların bir-birinin tarixini, mədəniyyətini və adət-ənənələrini daha yaxından tanıması baxımından da əhəmiyyətlidir.
Ekspert qeyd edib ki, Azərbaycan bu baxımdan geniş imkanlara malikdir. Ölkənin qədim İpək yolu üzərində yerləşməsi, müxtəlif sivilizasiyaların qovuşduğu məkan olması və zəngin tarixi abidələri fərqli turizm istiqamətlərinin inkişafına şərait yaradır.
“Azərbaycanın Bakı ilə məhdudlaşmayan çox geniş turizm potensialı var. Şəki, Qəbələ, Quba, Qusar, Lənkəran, Naxçıvan və digər bölgələr özünəməxsus turizm imkanlarına malikdir. Qarabağ və Şərqi Zəngəzurun turizm potensialının mərhələli şəkildə üzə çıxarılması da Azərbaycanın turizm xəritəsini daha da zənginləşdirə bilər”, - deyə türkiyəli ekspert əlavə edib.
Onun fikrincə, Azərbaycan təbiət, mədəniyyət, tarix, qastronomiya, sağlamlıq, dağ-xizək və digər turizm növlərinin inkişafı üçün əlverişli şəraitə malikdir. Bu istiqamətlərin bir-biri ilə əlaqələndirilməsi turistlərin ölkədə qalma müddətinin artırılmasına və müxtəlif regionların turizm dövriyyəsinə cəlb edilməsinə imkan verə bilər.
Soner Kılıç Türk dünyası ölkələri arasında ortaq turizm marşrutlarının yaradılmasının da əhəmiyyətini vurğulayıb. Bildirib ki, Azərbaycan, Türkiyə və Mərkəzi Asiyanın türk dövlətlərini əhatə edən tematik turizm marşrutlarının hazırlanması turistlərə bir səfər çərçivəsində müxtəlif ölkələrin ortaq tarixi və mədəni irsi ilə tanış olmaq imkanı verə bilər.
Ekspertin sözlərinə görə, bu istiqamətdə nəqliyyat əlaqələrinin inkişafı da mühüm amildir. Birbaşa aviareyslərin artırılması, regionlararası nəqliyyat imkanlarının genişləndirilməsi və turistlər üçün vahid turizm paketlərinin hazırlanması Türk dünyası daxilində səyahətlərin daha da asanlaşdırılmasına xidmət edə bilər.
“Azərbaycanın üstünlüklərindən biri də onun Türk dünyasının müxtəlif hissələrini Qafqaz və Xəzər regionu ilə əlaqələndirən mövqeyidir. Azərbaycan yalnız turist qəbul edən ölkə deyil, həm də Türk dünyasının ortaq turizm məkanının formalaşmasında mühüm mərkəzlərdən biri ola bilər”, - deyə Soner Kılıç bildirib.
Bölmənin digər xəbərləri
