“SOS UŞAQ KƏNDLƏRİ-AZƏRBAYCAN” ASSOSİASİYASI İDARƏ HEYƏTİNİN ÜMUMİ YIĞINCAĞI KEÇİRİLMİŞDİR
“SOS Uşaq Kəndləri-Azərbaycan” Assosiasiyası fəaliyyətinin altı illiyini qeyd edir. Bu münasibətlə AZƏRTAC xəbər verir ki, Assosiasiyanın üzvləri dekabrın 17-də Fəxri xiyabana gələrək, müstəqil Azərbaycan dövlətinin qurucusu, xalqımızın dahi oğlu, ümummilli lider Heydər Əliyevin əziz xatirəsini ehtiramla yad etdilər, məzarı önünə əklil qoydular.
Təşkilatın nümayəndələri görkəmli oftalmoloq alim, akademik Zərifə xanım Əliyevanın məzarını da ziyarət etdilər və gül dəstələri qoydular.
Həmin gün “SOS Uşaq Kəndləri-Azərbaycan” Assosiasiyası İdarə heyətinin ümumi yığıncağı keçirildi. Assosiasiyanın prezidenti Sevil xanım Əliyeva yığıncaqda iştirak etmək üçün “Bakı-SOS Uşaq Kəndi”nə gəldi.
Burada tərbiyə olunan uşaqlar Assosiasiyanın prezidentini böyük məhəbbətlə, gül-çiçəklə qarşıladılar.
Yığıncaqdan əvvəl Sevil xanım 2000-ci ildə xalqımızın ümummilli lideri Heydər Əliyevin göstərişi və qayğısı ilə Bakının Xətai rayonunda tikilib istifadəyə verilmiş “Bakı-SOS uşaq kəndi”nin fəaliyyəti ilə maraqlandı. Sevil xanım Əliyeva ayrı-ayrı evlərə, uşaq bağçasına baxdı, yaradılmış müasir şəraitlə tanış oldu.
Assosiasiyanın prezidentinə məlumat verildi ki, burada çalışan analar, tərbiyəçilər ulu öndərin arzu və istəyini böyük həvəslə yerinə yetirirlər. Hazırda 14 ailə evində 110-dan çox uşaq hərtərəfli qayğı ilə əhatə olunmuşdur. O cümlədən uşaq bağçasında dörd qrupda 95 uşaq tərbiyə alır.
Sevil xanım Əliyeva uşaqlarla səmimi görüşdü, onlara göstərilən diqqət və qayğının daha da artırılacağını söylədi.
Uşaqlar Heydər babanın qayğısını heç vaxt unutmadıqlarını bildirdilər, Sevil xanımı çay süfrəsinə dəvət etdilər və şəkilləri göstərdilər. Sevil xanım şəkillərə, eləcə də Uşaq kəndinin fəaliyyəti ilə bağlı fotoguşəyə böyük maraqla baxdı.
“SOS Uşaq Kəndləri-Azərbaycan” Assosiasiyasının ümumi yığıncağını Assosiasiyanın vitse-prezidenti Tahir Budaqov açaraq dedi ki, bu, təsis konfransından sonra keçirilən ilk ümumi yığıncaqdır. Assosiasiyanın yaradılmasının təşəbbüskarı, ümummilli lider Heydər Əliyevin əziz xatirəsini anmaq üçün bu gün onun məzarını ziyarət etmişik. Dahi rəhbərin xatirəsi hamımızın, onun qayğısını hiss edən, o cümlədən kimsəsiz uşaqların həmişə qəlbindədir. Nə qədər ki, Azərbaycan var, Heydər Əliyev daim ürəklərdə yaşayacaqdır.
Yığıncaq iştirakçıları ulu öndər Heydər Əliyevin xatirəsini bir dəqiqəlik sükutla yad etdilər.
Assosiasiyanın İdarə heyətinin üzvü Zəhra Quliyevanın da xatirəsi anıldı.
Sonra Assosiasiyanın altı illik fəaliyyətinə həsr olunmuş film göstərildi. Filmdə 1949-cü ildə Avstriyanın İmst şəhərində görkəmli humanist pedaqoq Herman Qmayner tərəfindən əsası qoyulmuş “SOS Kinderdorf İnternəşnl” təşkilatının respublikamıza gəlişindən, 1997-ci ildə bu təşkilat ilə Azərbaycan Respublikası hökuməti arasında razılaşma əldə olunmasından, 1999-cu ildə “SOS Uşaq Kəndləri-Azərbaycan” Assosiasiyasının yaradılmasından, Heydər Əliyevin təklifi ilə prezidentinin seçilməsindən, 2000-ci ildə Bakıda SOS Uşaq Kəndinin istifadəyə verilməsi mərasimindən, ulu öndər Heydər Əliyevin təşkilatın sədri Helmut Kutin ilə 1999-2000-ci illərdəki görüşlərindən, onun “Şöhrət” ordeni ilə təltif olunmasından, ümummilli liderimizin kimsəsiz uşaqlara diqqət və qayğısından ətraflı bəhs edilir.
Tahir Budaqov vurğuladı ki, Assosiasiyanın altı illik fəaliyyəti dövründə qazandığı uğurlar ulu öndər Heydər Əliyevin tövsiyəsi ilə bu təşkilata rəhbərlik edən Sevil xanımın adı ilə bilavasitə bağlıdır. Fərəhlə deyə bilərik ki, “SOS Kinderdorf İnternəşnl” təşkilatının fəaliyyət göstərdiyi 132 ölkə sırasında Azərbaycandakı SOS uşaq kəndi 30 ən yaxşı uşaq kəndi siyahısına daxil edilmişdir. Bu o deməkdir ki, ölkəmiz dünya dövlətləri üçün bu sahədə strateji layihələrin və proqramların hazırlanmasında birbaşa iştirak hüququ qazanmışdır.
Assosiasiyanın vitse-prezidenti daha sonra dedi ki, ulu öndərin tövsiyələrini layiqincə yerinə yetirmək üçün səylərimizi daha da artıracağıq. Artıq uşaqlar böyüyür, qayğıları artır. “Gənclər mərkəzi” layihəsi çərçivəsində onların həyata qovuşması, işlə təmin olunması, ailə qurduqdan sonra müstəqil yaşamaları üçün şərait yaradılacaqdır.
Natiq Assosiasiya tərəfindən Gəncə şəhərində tikilən “SOS Uşaq Kəndin”də tamamlama işlərinin getdiyini, yaxın vaxtlarda onun istifadəyə veriləcəyini söylədi, Sevil xanıma və Assosiasiyanın bütün üzvlərinə təşəkkürünü bildirdi.
Sonra Assosiasiyanın İdarə heyətinin üzvləri Abid Şərifov, akademik Ədilə Namazova, Fidumə Hüseynova çıxış edərək, Azərbaycanda kimsəsiz uşaqlara Heydər Əliyev tərəfindən göstərilmiş yüksək qayğını və köməyi xatırlatdılar, əbədiyaşar Prezidentin uşaqlara olan məhəbbətindən söhbət açdılar. Eyni zamanda, bildirildi ki, Assosiasiyanın nizamnaməsinə edilən yeni dəyişikliklərə uyğun olaraq, orta məktəbi bitirən yeniyetmələrin sonrakı taleyi ilə bağlı məsələlər də öz həllini tapacaqdır. Heydər Əliyevin xeyir-duası ilə təməli qoyulmuş hər bir iş xalqın gələcəyinə xidmət edir. Bu baxımdan həyata keçiriləcək yeni layihələr də kimsəsiz uşaqlar üçün səmərəli olacaqdır.
İdarə heyətinin üzvləri Sevil xanım Əliyevaya minnətdarlıqlarını bildirdilər, Uşaq kəndində çalışan analara və tərbiyəçilərə uğurlar arzuladılar.
İdarə heyətinin üzvü, “SOS Kinderdorf İnternəşnl” təşkilatının regional direktoru Zdenko Sedlar çıxışında qazanılan uğurların arxasında böyük zəhmət dayandığını vurğuladı, Prezident Heydər Əliyevin ideyalarının bütün zamanlarda Azərbaycan üçün faydalı olduğunu xatırladaraq, fəxrlə dedi ki, bizim böyük planlarımız var. Azərbaycanda “Gənclər Mərkəzi” yaradılacaqdır. Ailələrdə uşaqların atılmasının qarşısının alınması üçün tədbirlər görülür, üçillik proqram hazırlanır.
Respublikamızda dövlətin kimsəsiz uşaqlara qayğısını yüksək qiymətləndirən natiq dedi ki, Azərbaycan uşaqların yaxşı yaşaması üçün yerli səviyyədə maliyyələşmənin həcmini artıran ölkələr sırasına salınmışdır. Bütün müsbət ideyalar, işlər təşkilatımız tərəfindən dəstəklənəcəkdir.
Sonra Assosiasiyanın nizamnaməsi əlavə və dəyişikliklər nəzərə alınmaqla təsdiqləndi. Sevil xanım Əliyeva yeni nizamnaməyə əsasən, yekdilliklə “SOS Uşaq Kəndləri-Azərbaycan” Assosiasiyasının fəxri prezidenti seçildi.
Assosiasiyanın 25 nəfərdən ibarət idarə heyətinə seçilən yeni üzvlər təsdiqləndi. Tahir Budaqov Assosiasiyanın İdarə heyətinin sədri seçildi.
“SOS Uşaq Kəndləri-Azərbaycan” Assosiasiyasının fəxri prezidenti Sevil xanım Əliyeva yığıncaqda çıxış etdi.
Bölmənin digər xəbərləri
