SOS UŞAQ KƏNDLƏRİ–AZƏRBAYCAN”ASSOSİASİYASININ FƏXRİ PREZİDENTİ SEVİL ƏLİYEVANIN ÇIXIŞI
Sizinlə bugünkü görüşdə iştirak etməyimdən çox şadam. “SOS Uşaq Kəndləri-Azərbaycan” Assosiasiyası artıq 6 ildir ki, yaranmışdır və ölkəmizin həyatında fəal rol oynayır. Assosiasiyanın gördüyü bütün işlər barədə xəbərim var və onun həyatında baş verən hadisələrdə iştirak edirəm. Mən bu Assosiasiyaya atam Heydər Əliyevin tövsiyəsi ilə rəhbərlik edirəm və buna çox şadam.
İndi dünyanın hər yerində valideyn himayəsindən məhrum olmuş uşaqlara ailə şəraitindəki kimi qayğı göstərməyin yolları barədə düşünürlər. Mənə elə gəlir ki, SOS ideyası bu baxımdan ən münasib və uğurlu yol sayıla bilər. Valideyn himayəsindən məhrum olmuş uşaqlar və uşaq sevgisinə həsrət qalmış qadınlar burada, demək olar ki, öz səadətini tapmışlar. Buradakı uşaqlar yenidən isti Ana nəfəsi duymuş, özlərini təhlükəsiz hiss etmişlər, qadınlar isə bu körpələrin dilindən ilk dəfə özlərinə deyilən Ana sözü eşitmişlər. Həyatda bundan gözəl nə ola bilər!
Ana sözü mənim üçün müqəddəs, Tanrı sözünə bərabər sözdür. Mən bu sözü yazılarımda da böyük hərflə yazıram. Çünki bu söz son dərəcə ülvi bir məna daşıyır. Əminəm ki, bu, hər birimiz üçün ən məsuliyyətli, ən vacib sözdür. Belə olmalıdır və Həyat bəxş edən Ana öz körpəsini düzgün tərbiyə etdikdə, ona ən yaxşı insani hisslər və vətəndaşlıq keyfiyyətləri aşılamağı bacaranda həmişə belə də olur. Axı, bugünkü uşaqlar cəmiyyətimizin gələcəyidir.
Xatirimdədir, atam Heydər Əliyev görüşlərindən birində uşaqları cəmiyyətimizin aynası adlandıraraq demişdir: Bizim arzumuz budur ki, bu ayna həmişə ləkəsiz, təmiz və işıqlı olsun.
Buna nail olmağın yəqin ki, müxtəlif yolları və vasitələri var. Həmişə məhəbbətin, qarşılıqlı hörmətin, bir-birinə diqqət və qayğının hökm sürdüyü ailədə böyümüş bir insan kimi mən hesab edirəm ki, buna nail olmağın başlıca yolu sevməyi bacarmaq, səmimi münasibətlər, sözün ən geniş mənasında xeyirxahlıqdır. Uşaqlıqdan bizə məhz bu keyfiyyətləri aşılamışlar və hesab edirəm ki, bütün bunlar bizim şəxsiyyət kimi formalaşmağımızda mühüm rol oynamışdır. Bəlkə də bu keyfiyyətləri məndə görən atam mənə həmin təşkilata rəhbərlik etməyi təklif etmişdir. O, təkcə bizimlə, övladları ilə deyil, ümumiyyətlə, bütün uşaqlarla ünsiyyətdən böyük məmnunluq duyurdu. Buna görə də onlarla tez-tez görüşür, hərtərəfli qayğı göstərir və həmişə deyirdi: Biz böyüklər bircə təbəssümlə uşaqlara dünyaları bəxş edə bilərik.
Mən istəyirəm ki, biz bu sözləri unutmayaq və uşaqlara tez-tez təbəssüm bəxş edək, onlara elə münasibət bəsləyək ki, hər biri balaca qəlbi ilə bizim Ana məhəbbətimizi hiss etsin.
Mən əminəm ki, burada, bizim Uşaq kəndində hər şey məhz belədir. Axı, məhəbbətin hüdudu yoxdur. Ona görə də özlərini burada yaşayan uşaqların tərbiyəsinə həsr etmiş, onların qayğısına qalan Analara minnətdarlığımı bildirirəm. Analara möhkəm cansağlığı və dözüm arzulayaraq, bir daha demək istəyirəm: Məhəbbətinizi, təbəssümünüzü əsirgəməyin, uşaqlara daim qəlbinizin hərarətini bəxş edin.
Siz bunun bəhrəsini görəcəksiniz, hamımız görəcəyik, Vətənimiz bunun bəhrəsini görəcəkdir.
Mən bunu öz şəxsi təcrübəmdən bilirəm. Mən də uşaq olmuşam, indi isə Anayam. Qəlbimizin hərarətinə, bizim köməyimizə və diqqətimizə uşaqların necə ehtiyacı olduğunu bilirəm.
Uşaqlara qayğı hər bir cəmiyyətdə əsas sosial problemlərdən biridir. Təəssüf ki, hər il yüzlərlə, minlərlə uşaq valideyn himayəsindən məhrum olur. Allaha şükürlər olsun ki, Azərbaycanda ailə ənənələri digər ölkələrə nisbətən daha möhkəm olduğuna görə, bu rəqəm o qədər də böyük deyildir. Amma hər halda, bizim ölkəmizdə də valideyn himayəsindən məhrum olan uşaqlar vardır. Bu, reallıqdır. Ona görə də bizim Assosiasiyanın belə uşaqlardan, heç olmasa, 118-nə ailə hərarəti, Ana məhəbbəti bəxş etdiyini görmək çox xoşdur. Bu, ilk növbədə, Heydər Əliyevin xüsusi qayğısı, habelə xaricdən olan xeyirxah insanların dəstəyi və SOS işinə cəlb olunmuş insanların fədakarlığı sayəsində mümkün olmuşdur.
Mən, zənnimcə, heç də sadə olmayan daha bir məsələyə toxunmaq istəyirəm. Bunu deyərkən, bizim uşaqların xarici vətəndaşlar tərəfindən övladlığa götürülməsini, əslində, onların xaricə satılmasını nəzərdə tuturam. Hesab edirəm ki, bu, düzgün deyildir. Axı, yetkinlik yaşına çatmayan uşaq öz gələcəyini müəyyən edə bilməz. Ona görə də, hətta formal da olsa, məhz bu səbəbə görə azyaşlı uşaqlarla alver etmək olmaz.
Əlbəttə, doğulduqları ölkədən aparılan uşaqların sonrakı taleyinin xoşbəxt olduğu hallar da var. Ancaq gələcək vətəndaşlarımızı itirməyə dəyərmi? Yaxşı olmazmı ki, elə yollar axtarıb tapaq ki, onlar öz doğma torpağında, öz ölkəsində sağlam və xoşbəxt böyüsünlər?!
Bu baxımdan atamın öz çıxışlarından birində dediyi sözləri xatırlamaq istəyirəm. O demişdir ki, beynəlxalq təşkilatlar tərəfindən ona edilən bütün təkliflərdən ən çox “SOS Kinderdorf İnternəşnl” təşkilatının təklifini qiymətləndirir. Həmin təşkilat Azərbaycanda məhz bu istiqamətdə işləmək istədiyini bildirmişdir. Mən çox şadam ki, bu təşkilatın fəaliyyəti ölkəmizdə də geniş vüsət almışdır. Məsələn, indi Gəncədə də SOS Uşaq Kəndinin tikintisi başa çatmışdır, Analar və uşaqlar tezliklə öz evlərinə köçəcəklər. Bu, Heydər Əliyevin arzusu idi. Biz xoşbəxtik və fəxr edirik ki, onun arzusu həyata keçir. Ümidvaram ki, çox tezliklə biz Uşaq kəndinin təntənəli açılışında birlikdə iştirak edəcəyik.
Fürsətdən istifadə edərək, “SOS Kinderdorf İnternəşnl” təşkilatının regional direktoruna və bütün rəhbərlərinə ölkəmizə göstərdikləri xoş münasibətə görə dərin minnətdarlığımı bildirirəm. Biz çox gözəl başa düşürük ki, qısa müddətdə bir ölkədə 2 SOS Uşaq Kəndinin yaradılması barədə qərar qəbul etmək çox nadir hadisədir. Hesab edirəm ki, bu, həm də bizim aramızda yaranmış, həqiqətən, mehriban münasibətləri göstərir və biz gələcəkdə bunu daha da inkişaf etdirməliyik.
Əziz həmkarlarım, mənə bir daha göstərdiyiniz yüksək etimada görə hamınıza təşəkkür etmək, çətin, lakin çox xeyirxah işinizdə sizə ürəkdən uğurlar arzulamaq istəyirəm.
X X X
Sevil xanım Əliyevaya hədiyyələr təqdim olundu.
Uşaqların nümayiş etdirdiyi bədii proqram böyük maraqla qarşılandı.
Assosiasiyanın fəxri prezidenti Uşaq kəndi kollektivinin üzvləri ilə xatirə şəkli çəkdirdi.
Bölmənin digər xəbərləri
