SOYQIRIMI QURBANLARININ XATİRƏSİ YAD EDİLMİŞDİR
Bakı, 31 mart (AZƏRTAC). Martın 31-də Daxili İşlər Nazirliyində Azərbaycanlıların soyqırımı gününə həsr olunmuş anma mərasimi keçirilmişdir.
Tədbiri giriş sözü ilə açan daxili işlər naziri, general-polkovnik Ramil Usubov erməni millətçilərinin iki əsr öncə azərbaycanlılara, türklərə qarşı başladıqları soyqırımı siyasətinin XXI əsrin əvvəllərinədək davam etdiyini, bu mənfur siyasət nəticəsində yüz minlərlə insanın həyatına son qoyulduğunu, soyqırımı barədə real faktların uzun müddət təhrif olunduğunu, gizlədildiyini və əsl həqiqətlərin tarixi ədəbiyyatda öz əksini tapmadığını təəssüflə bildirmişdir.
Soyqırımının bu illər ərzində erməni şovinizminin əsas aparıcı xəttinə çevrildiyini xatırladan Ramil Usubov, məhz ümummilli lider Heydər Əliyevin yenidən ali hakimiyyətə qayıtdıqdan sonra həmin cinayətkar fəaliyyətə, iki əsr ərzində xalqımıza qarşı törədilmiş vəhşiliklərə obyektiv hüquqi-siyasi qiymət verdiyini, ulu öndərin tarixi ədaləti bərpa edərək 1998-ci ilin martın 26-da imzaladığı Fərmanla 31 martın Azərbaycanlıların soyqırımı günü elan edildiyini vurğulamışdır. Qeyd olunmuşdur ki, məhz bu tarixi sənəddən sonra hər il ölkəmizdə, eləcə də dünyanın bir çox dövlətlərində soyqırımla əlaqədar müxtəlif anma mərasimləri, xatirə tədbirləri keçirilir, erməni şovinizminin bu dəhşətli cinayəti pislənilir .
General-polkovnik Ramil Usubovun təklifi ilə mərasim iştirakçıları soyqırımı qurbanlarının xatirəsini bir dəqiqəlik sükutla yad etmişlər.
Bakı Dövlət Universitetinin professoru, tarix elmləri doktoru Musa Qasımlı faktlara, arxiv mənbələrinə əsaslanaraq, böyük imperialist güclərin, dairələrin himayədarlığı ilə erməni millətçiləri və silahlı birləşmələri tərəfindən nəinki Bakıda, ölkəmizin müxtəlif bölgələrində günahsız soydaşlarımızın, qocaların, qadınların və uşaqların milli və dini mənsubiyyətə görə sistemli və kütləvi şəkildə, amansız və vəhşi metodlarla məhv edilməsi, həmin qanlı hadisələrin çox geniş coğrafiyaya malik olması barədə ətraflı məruzə ilə çıxış etmişdir.
Tədbirə yekun vuran nazir, general-polkovnik Ramil Usubov soyqırımı barədə həqiqətlərin, faktların ölkə ictimaiyyətinə, xüsusilə də gənc nəslə çatdırılmasının, erməni millətçiləri tərəfindən xalqımızın başına gətirilən müsibətlərin, vəhşiliklərin unudulmasının yolverilməzliyini və həmin hadisələrdən hər bir azərbaycanlının özü üçün nəticə çıxarmasının vacibliyini vurğulamışdır. DİN rəhbəri bildirmişdir ki, hər bir azərbaycanlı, Vətənini, torpağını sevən hər bir şəxs, o cümlədən daxili işlər orqanlarının əməkdaşları bu kədərli tarixi, soyqırımını heç bir zaman unutmamalı, ölkəmizdə əmin-amanlığın, sabitliyin qorunmasına, dövlətçiliyimizin möhkəmləndirilməsinə öz töhfəsini verməli, Azərbaycan dövləti, onun Prezidenti ətrafında daha sıx birləşməlidir.
Bölmənin digər xəbərləri
