“SPRING LAB” təhsil proqramının finalçıları müəyyənləşib
Bakı, 29 mart, AZƏRTAC
“Sea Breeze” ərazisində yerləşən Polo Café-də “EkoSfera” Sosial-Ekoloji Mərkəzi ilə birgə həyata keçirilən, 6–22 yaşlı uşaqlar və gənclər arasında ekoloji düşüncə və sahibkarlıq bacarıqlarının inkişafına yönəlmiş “SPRING LAB” təhsil proqramının seçim turu keçirilib.
AZƏRTAC xəbər verir ki, seçim mərhələsinin nəticələrinə əsasən, cari ilin mayında təşkil olunacaq “SPRING LAB” proqramının finalına 13 layihə vəsiqə qazanıb. Layihələr ekoloji əhəmiyyət, innovativlik, reallaşdırılma imkanları, praktiki fayda, davamlılıq və təqdimat keyfiyyəti kimi meyarlar üzrə qiymətləndirilib. Finalda ən yaxşı startap ideyasının müəllifi Qran-pri - pul mükafatı və layihənin “Sea Breeze” ərazisində həyata keçirilməsi imkanı ilə mükafatlandırılacaq.
Təqdim olunan 50 müraciətdən 38 layihə yaz seçim turuna keçib. Bu mərhələdə dörd istiqamət üzrə təşəbbüslər təqdim olunub: “yaşıl” marşrutlar və ekoloji maarifləndirmə, landşaft və təbiət, eko-uşaq məkanları və təbiət oyunları, həmçinin alternativ enerji və tullantıların utilizasiyası sahəsində innovasiyalar.
Münsiflər heyətinə “EkoSfera” Sosial-Ekoloji Mərkəzinin, “Sea Breeze” və WUF13-ün nümayəndələri, eləcə də davamlı inkişaf, mədəniyyət, təhsil və ekologiya sahələri üzrə mütəxəssislər daxildir.
“Bu təşəbbüsün əsas dəyəri ondadır ki, “Sea Breeze” gələcək nəslə yalnız ideyalarını təqdim etmək imkanı deyil, həm də onların reallaşdırılması üçün real dəstək verir. Layihələrin həyata keçirilməsi imkanını görmək iştirakçılar üçün ən güclü motivasiyadır və göstərir ki, onların ekoloji təşəbbüsləri həqiqətən tələb olunur, kurort-şəhərin davamlı inkişafının bir hissəsinə çevrilə bilər”, – deyə “EkoSfera” Sosial-Ekoloji Mərkəzinin rəhbəri Firuzə Sultan-zadə bildirib.
“Bu gün belə təşəbbüslər xüsusi əhəmiyyət kəsb edir, çünki Azərbaycanda davamlı inkişaf və ətraf mühit məsələlərinə böyük diqqət yetirilir. WUF13 ərəfəsində bu mövzu daha da аktualdır və bu prosesə uşaqların da cəlb olunması vacibdir. Proqramın ən kiçik iştirakçısı cəmi 6 yaşındadır. Belə layihələr fantaziyanın inkişafına, ekoloji düşüncənin formalaşmasına və yeni nəslin yetişdirilməsinə töhfə verir”, - deyə davamlı inkişaf və strateji kommunikasiyalar üzrə ekspert, jurnalist, televiziya aparıcısı və uşaq kitablarının müəllifi Liya Bayramova qeyd edib.
“Sea Breeze”də “Light for the Planet – Earth Hour Workshop” adlı uşaq təhsil proqramı da keçirilib. İştirakçılar üçün eko-şamların hazırlanması və “bankada biolüminessensiya” mövzularında master-klass dərsləri təşkil olunub, həmçinin “Earth Hour” (“Yer saatı”) barədə mühazirə təqdim edilib.
Belə layihələr “Sea Breeze”in fəaliyyətində mühüm yer tutur, ekoloji təhsili, gənclərin ideyalarını və davamlı mühitin inkişafına töhfə verə biləcək praktiki həlləri bir araya gətirir.
Redaksiya
Bölmənin digər xəbərləri
