“SPRUT”UN SSENARİ MÜƏLLİFİ VƏFAT ETMİŞDİR
AZƏRTAC xarici informasiya agentliklərinə istinadla xəbər verir ki, məşhur “Sprut” serialının ssenari müəllifi Ennio De Konçini uzun sürən ağır xəstəlikdən sonra 85 yaşında Romada dünyasını dəyişmişdir.
Azərbaycan tamaşaçılarının da rəğbətini qazanmış flimin ssenari müəllifi 1923-cü il dekabrın 9-da İtaliya paytaxtında anadan olmuşdur. Onun yazdığı ssenari əsasında 150-dən artıq film çəkilmişdir. Onların arasında ən tanınmışı 1984-cü ildə istehsal olunmuş «Sprut» teleserialıdır. Teleserialda komissar Kattani rolunu Mikele Plaçido oynayır. Filmin rejissoru Damiano Damianidir.
De Konçini karyerasına İkinci dünya müharibəsindən sonra başlamışdır. Onun əsərləri arasında İtaliya kinosunun «Qışqırıq» (rejissor Mikaelanceola Antonioni) «İblisin maskası» (Mario Bava) filmləri kimi şah əsərlərinin ssenarisi də vardır.
1962-ci ildə De Konçini Pyetro Cerminin «İtalyansayağı boşanma» filminin ssenarisinə görə «Oskar» mükafatı almışdır. Filmdə Marçello Mastroyanni və Stefaniya Sandrelli kimi kino ulduzları oynayırlar.
De Konçini 1980-ci illərdən sonra televiziyalarla əməkdaşlıq etməyə başlamışdır. Bu əməkdaşlıq nəticəsində «Sprut» teleserialı yaranmışdır.
Bölmənin digər xəbərləri
