“STATİSTİKA HAQQINDA” QANUNA ƏLAVƏLƏR VƏ DƏYİŞİKLİKLƏR EDİLƏCƏKDİR

20.12.2005 [17:41]
Çap et
A⁺ A^-

Dövlət Statistika Komitəsinin sədri Arif Vəliyev AZƏRTAC-ın müxbirinə demişdir ki, komitənin işinin keyfiyyətini artırmaq, asanlaşdırmaq, beynəlxalq standartlar səviyyəsinə qaldırmaq, eləcə də digər strukturlarla əlaqələrini genişləndirmək məqsədi ilə “Statistika haqqında” Qanuna əlavələr və dəyişikliklər ediləcəkdir.

Həmin dəyişikliklərin birində, komitənin nəzdində Statistika Şurasının yaradılması nəzərdə tutulur. Bu Şura məlumatların toplanması işini asanlaşdırmaqla yanaşı, komitə ilə dövlət qurumları və nazirliklər arasında əlaqələrin genişlənməsində mühüm rol oynayacaqdır. Layihədə, həmçinin, Avropa Statistika Təşkilatının tövsiyələrinə uyğun olaraq, məlumatların dövlət və hökumət orqanlarına, kütləvi informasiya vasitələrinə pulsuz verilməsi, fiziki və hüquqi şəxslərə aid məlumatların onların icazəsi olmadan dərc olunmaması, yayılmaması və digər mühüm məsələlər əksini tapmışdır. Bundan əlavə, sənəddə bir sıra redaktə xarakterli dəyişikliklərin də edilməsi nəzərdə tutulmuşdur.

Layihə artıq Milli Məclisin müzakirəsinə təqdim olunmuşdur.