Sudan ordusu hərbi əməliyyatların yekun mərhələsinə başlayıb
Bakı, 17 aprel, AZƏRTAC
Sudan ordusu hərbi əməliyyatların yekun mərhələsinə qədəm qoyub və xüsusi təyinatlı qüvvələri təqib edir.
AZƏRTAC xəbər verir ki, Al Hadath telekanalı bu barədə Sudan ordusunun nümayəndəsinə istinadla məlumat yayıb. Onun sözlərinə görə, silahlı qüvvələr əvvəlcədən hazırlanan plan üzrə döyüşlər aparır və bütün mövqelərini qoruyub saxlayır. Qiyam edən çox sayda xüsusi təyinatlı təslim olur, bəziləri isə mövqelərini ataraq qaçır.
Ordu nümayəndəsinin bu bəyanatı yenidən ordunun əlinə keçən Sudan televiziyasının efirində səslənib.
Xatırladaq ki, Suveren Şuraya rəhbərlik edən Sudan ordusunun komandanı Əbdül Fəttah əl-Burhanla həmin şurada onun müavini olan xüsusi təyinatlı qüvvələrin başçısı Məhəmməd Həmdan Daqalo arasında fikir ayrılığı səbəbindən ölkədə vəziyyət gərginləşib. Aprelin 15-də Merove şəhərindəki hərbi baza yaxınlığında və paytaxt Xartumda iki güc strukturu arasında toqquşmalar başlayıb. Son məlumata görə, döyüşlər nəticəsində 100-ə yaxın dinc sakin həlak olub.
Bölmənin digər xəbərləri
