Tarix Muzeyində beynəlxalq əlaqələrin genişləndirilməsi istiqamətində görüş keçirilib
Bakı, 18 mart, AZƏRTAC
Martın 18-də Milli Azərbaycan Tarixi Muzeyində Bakıdakı Rusiya İnformasiya və Mədəniyyət Mərkəzinin (RİMM) yeni rəhbəri İrek Zinnurovla görüş keçirilib.
Muzeydən AZƏRTAC-a bildirilib ki, görüşdə Tarix Muzeyi ilə RİMM-in uzunmüddətli sıx əməkdaşlığı, həm Azərbaycan, həm də Rusiya tarixini və mədəniyyətini əks etdirən birgə layihələr haqqında söhbət aparılıb. Hər iki qurumun təşkilatçılığı ilə keçiriləcək yeni layihələr, elmi tədbirlər və Rusiya muzeyləri ilə birgə sərgilərin təşkili, elmi tədqiqatların aparılması istiqamətində fəaliyyətin genişlənməsində əməkdaşlıq perspektivləri müzakirə olunub.
Muzeyin direktoru, akademik Nailə Vəlixanlı 2020-ci ildə muzeydə faşizm üzərində qələbənin 75-ci ildönümünə həsr olunan “Azərbaycan II Dünya müharibəsi illərində” sərgisi haqqında da ətraflı məlumat verib. Həmçinin tarixçi-alim İ.Zinnurovu muzeydə təqdimatı planlaşdırılan 44 günlük Vətən müharibəsinə həsr olunmuş “Anadır arzulara hər zaman Qarabağ!” adlı sərgiyə də dəvət edib.
Sonda qonağa muzeyin 100 illiyinə həsr olunmuş nəfis tərtibatlı nəşrlər təqdim olunub.
İrek Zinnurov RİMM-in kitabxanasını zənginləşdirəcək dəyərli kitablara görə akademik Nailə Vəlixanlıya minnətdarlığını bildirib.
Bölmənin digər xəbərləri
