Tarix Muzeyinin “Tarix yazan qəhrəmanlar” layihəsi davam edir
Bakı, 24 aprel, AZƏRTAC
Milli Azərbaycan Tarixi Muzeyinin “Tarix yazan qəhrəmanlar“ layihəsi davam edir.
Bu barədə AZƏRTAC-a muzeydən məlumat verilib. Bildirilib ki, “Gənc muzeyşünaslar və muzeysevərlər klubu”nun rəhbəri Sahibə Ələkbərova ideya müəllifi və rəhbəri olduğu layihə çərçivəsində, klub üzvü, Azərbaycan Turizm və Menecment Universitetinin üçüncü kurs tələbəsi Nabat Əlizadə ilə birgə II Qarabağ müharibəsi şəhidi Yaqub Yaqubzadənin doğum günü ilə əlaqədar şəhidin ailəsini ziyarət ediblər. Onlar görüş zamanı xatirə əşyalarından ibarət guşə ilə tanış olublar. Layihə iştirakçıları şəhidin ailəsi, yaxınları və “ASAN Radio” kollektivi ilə birgə Xəzər rayonu Qala qəsəbəsində şəhidin məzarını ziyarət ediblər.
Qeyd edək ki, Yaqub Yaqubzadə 1999-cu il aprelin 22-də Bərdə rayonunun Alaçadırlı kəndində anadan olub. O, II Qarabağ müharibəsi başlayan zaman Murovdağ uğrunda cəsur əsgər kimi döyüşüb. Ötən il oktyabr ayının 3-də Murovdağ istiqamətində gedən döyüşlərdə şəhidlik zirvəsinə yüksəlib.
Y.Yaqubzadə ölümündən sonra “Vətən uğrunda” və “Kəlbəcərin azad olunmasına görə” medalları ilə təltif olunub. Onun rəssam tərəfindən çəkilmiş portretini şəhidin anası Səmurə Məmmədova Milli Azərbaycan Tarixi Muzeyinə təhvil verib.
Bölmənin digər xəbərləri
