Bakı, 5 avqust, AZƏRTAC

Azərbaycan Avrasiya məkanının önəmli logistik yolayrıcı kimi mühüm geosiyasi əhəmiyyətə malikdir. Əgər ölkəmiz ötən əsrin 90-cı və XXI yüzilliyin ilk illərində enerji daşıyıcılarının Qərb bazarlarına nəqli üçün diqqət mərkəzində idisə, hazırda dünya iqtisadiyyatında izlənən yeni trendlər baxımından fərqli potensiala malik dövlət kim diqqəti cəlb edir. Alternativ enerji mənbələri, yeni və sabit ticarət marşrutları, ekoloji cəhətdən təmiz enerjinin uzun məsafələrə daşınması müasir dünyamızın ən vacib çağırışlarındandır. Göründüyü kimi, hər iki halda Azərbaycanın regional liderliyi fonunda bölgəmizin əhəmiyyəti nəzərəçarpacaq dərəcədə yüksəlməkdədir.

Bu fikirləri AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Elnur Allahverdiyev deyib.

Bu fonda iki mühüm amili xüsusi vurğulayan deputat deyib: “Əvvəla onu qeyd etmək lazımdır ki, 44 günlük Vətən müharibəsində Zəfərimizdən sonra yaranan yeni geosiyasi reallıq fonunda qlobal, transmilli iqtisadi imkanlar kontekstində Azərbaycanın strateji çəkisi xeyli artıb. İkinci diqqətçəkən məqam isə bu perspektivi vaxtında dəyərləndirən hökumətimizin həyata keçirdiyi köklü iqtisadi islahatlar, daha konkret desək, neft və qaz ixracından istehsala yönəlik, inkişaf etmiş kənd təsərrüfatına malik iqtisadiyyata keçidin təmin edilməsi məsələsidir. Son iki ilin əsas iqtisadi sənədi ən böyük dövlət büdcələrinin qəbul edilməsidir”.

Deputat diqqətə çatdırıb ki, Azərbaycan ərazisinə görə o qədər böyük olmasa da, beynəlxalq aləmdə əhəmiyyətli siyasi və iqtisadi layihələrin həm təşəbbüskarı, həm də həlledici bəndi kimi yüksək reputasiyaya malik dövlətdir. Azərbaycan 30 il bundan əvvəl olduğu kimi təkcə neft ölkəsi deyil. Neft bizim üçün dünyaya tanınmaq, iqtisadi gücümüzə yatırım etmək, əhalimizin sosial rifah halına dəstək vermək və təbii ki, qeyri-neft sektorunu inkişaf etdirmək üçün vasitədir. Ölkəmiz enerji daşıyıcılarının ixracatçısı olmaqla yanaşı, son illərdə həm də qlobal təşəbbüslərin - qitələri birləşdirən, bir neçə istiqamətə uzanan yolların açar nöqtələrindən biri rolunu oynayır.

E.Allahverdiyevin sözlərinə görə, Çindən Qərbə doğru uzanan nəqliyyat marşrutları ilə daşınan məhsulun həcminin artması gerçəkliyində Şimal dəhlizlərinin iflic vəziyyətə düşməsi Cənubi Qafqaz bölgəsinin, daha doğrusu, Azərbaycanın liderliyi və təşəbbüsləri ilə regional logistik haba çevrilmiş coğrafi məkanımızın dünya iqtisadiyyatı üçün dəyəri əvəzolunmazdır.

Hazırda dünyanın işgüzar dairələrinin və qlobal iqtisadi problemləri araşdıran mərkəzlərin diqqətində olan ən aktual mövzulardan biri və bəlkə də birincisi Azərbaycanın açar rolunu oynadığı Orta dəhliz marşrutudur. Çindən Avropaya doğru uzanan və Türk dünyasının tarixi özəyini təşkil edən Mərkəzi Asiya, Cənubi Qafqaz və Türkiyədən keçməklə “qoca qitə”yə doğru istiqamət götürən ticarət yolları sonu görünməyən Rusiya-Qərb ziddiyyətləri müstəvisində müasir dünya iqtisadiyyatı üçün vacib xilas yoludur. 44 günlük müharibədən sonra Azərbaycan qan qardaşlarımız olan Qazaxıstan, Özbəkistan və Türkmənistanla bu istiqamətdə - logistika imkanlarımızın birləşdirilməsi və vahid sistem modelində fəaliyyəti yönündə intensiv diplomatik addımlar atmaqdadır. Qonşu Gürcüstan və qardaş Türkiyə ilə bu platformada illəri əhatə edən, uğurla tamamlanan işlək mexanizm tarixin sınağından uğurla çıxıb. İndi bu vahid logistik məkanın Şərqə doğru genişlənməsi vacibdir. Çünki bu, dövrümüzün başlıca tələbi və çağırışıdır. Bu, iqtisadi dividendlərdən savayı, həm də əsrlər boyu arzuladığmız, mütəfəkkirlərimiz və ziyalılarımızın mənəvi və nəzəri yönlərini araşdırdıqları Türk birliyinin gerçəkliyə çevrilməsi üçün tarixi şansdır. Bu əməkdaşlıq Ulu Öndər Heydər Əliyevin arzularından biri idi. Ümummilli Lider izlədiyimiz mənzərənin reallığa çevrilməsi, gələcək nəsillərin iqtisadi rifahı və dövlətimizin təhlükəsizliyi üçün vaxtilə tarixi addımlar atıb.

“Bu gün biz aydın şəkildə görür və dərk edirik ki, ölkəmizin az qala neft və qaz ehtiyatlarından daha çox qiymətləndirilməyə başlanmış logistik əhəmiyyətinin əsası məhz ötən əsrin sonlarında xalqımızın Ümummilli Lideri Heydər Əliyev tərəfindən qoyulub. Miqyaslı düşünmək yalnız böyük siyasi liderlərə xas keyfiyyət və bacarıqdır. Bu gün Qərbin və Çinin böyük səylər sərf etdikləri bu ticarət yollarının maketi məhz həmin illərdə, Ulu Öndərin tükənməz enerji ilə həyata keçirdiyi regional və daha geniş coğrafiyaya hesablanmış xarici siyasətin məntiqi nəticəsidir. Çoxları unuda bilər, ancaq aktuallığı gündən-günə artan və qlobal iqtisadiyyat üçün ən ucuz transmilli yükdaşıma layihəsi olan Orta Dəhliz Ulu Öndər Heydər Əliyevin böyük önəm verdiyi böyük İpək yolu” layihəsinin bazasında qərarlaşıb və faktiki olaraq onun davamıdır. Məhz Ulu Öndərin çoxsaylı təşəbbüslərinə əsasən Avropa İttifaqı ilə bu istiqamətdə ciddi və məhsuldar danışıqlar keçirilib. Bir çoxları sözügedən layihənin o dövrün reallıqları baxımından uğursuzluğa düçar olduğunu düşünüb və onun tarixin arxivində qaldığını hesab ediblər. Ancaq bugünkü proseslər bunun tam əksini sübut edir. Çünki qeyd etdiyimiz kimi, böyük tarixi simalar bu gün atdıqları addımları ilə illər sonranın reallığının əsasını qoyurlar”, - deyə E.Allahverdiyev diqqətə çatdırıb.

Ölkəmizin nüfuzunu və əhəmiyyətini şərtləndirən amillərdən danışan deputat bunların siyasi və ictimai sabitlik, möhkəm hüquqi bünövrə, əsaslı iqtisadi potensial və imkanlar, dövlətin iradəsi, intellektual baza olduğunu vurğulayıb. Ümummilli Liderin ötən əsrin 90-cı illərində həyata keçirdiyi köklü islahatlar məhz bu amillərin bərqərar olmasına xidmət edirdi.

“Ümummilli Lider Heydər Əliyevin ölkəmizin iqtisadi potensialının güclənməsi və dünya iqtisadiyyatı üçün maraq dairəsinə çevrilməsi üçün həyata keçirdiyi tədbirlər Prezident İlham Əliyev tərəfindən müasir geosiyasi çağırışlar və iqtisadi trendlərlə uzlaşdırılaraq uğurla davam etdirilir. Xüsusilə son iki il ərzində ölkəmizin bu potensialı böyük artım göstəricilərini nümayiş etdirir. Azərbaycan indiki reallığı illər öncə görüb və Prezident İlham Əliyevin rəhbərliyi ilə bu istiqamətdə tarixi addımlar atılıb. İnkişaf etmiş yol infrastrukturu, bizi Qərb bazarları ilə birləşdirən dəmir yolu və enerji daşıyıcıları - kəmərlər, regionun mühüm ticari bəndinə çevrilən yeni dəniz limanı məhz dövlətimizin başçısının fədakar əməyinin nəticələridir. Bu infrastruktur illər sonra iqtisadiyyatımızın ana xəttini təşkil edəcək və büdcəmizə böyük vəsaitlərin daxil olmasına səbəb olacaq. Ancaq biz bu potensiala təkcə maddi cəhətdən yanaşmamalıyıq. Çünki Orta Dəhlizin reallaşacaq yeni istiqaməti olacaq Zəngəzur dəhlizi bizim üçün hər şeydən əvvəl mənəvi dəyərdir - xalqımızın tarixi torpaqlarına qovuşması üçün başlıca hədəfdir. Həmin hədəf ki, Ulu Öndərimiz onun bir gün gerçəkləşəcəyinə inanırdı”, - deyə deputat fikirlərini yekunlaşdırıb.