TƏBİİ FƏLAKƏT BÖLGƏSİNDƏ TƏHLÜKƏSİZLİK TƏDBİRLƏRİ DAVAM ETDİRİLİR
İmişli, 27 may (AZƏRTAC). Kür boyu ərazilərini su basmış rayonlarda Prezident İlham Əliyevin göstərişlərinə uyğun olaraq kompleks işlər davam etdirilir.
İki gün əvvəl Hacıqabul rayonunun Meyniman kəndində dağılmış bənd artıq bərpa olunmuşdur.
İmişli, Saatlı, Sabirabad rayonları ərazisində yerləşən Sarısu gölü ətrafında bəndbərkitmə və bərpa işləri davam etdirilir. Fövqəladə Hallar, Müdafiə nazirliklərinin, Daxili Qoşunların şəxsi heyəti, “Meliorasiya və Su Təsərrüfatı” Açıq Səhmdar Cəmiyyətinin texnikası yarana biləcək təhlükələrin aradan qaldırılması istiqamətində zəruri tədbirlər görürlər.
Kür və Araz çaylarının daşması nəticəsində baş verən təbii fəlakətlə əlaqədar yaradılan komissiyanın üzvləri yerlərdə təsərrüfatlara və sahibkarlara dəyən ziyanı hesablayırlar.
Araz çayının tarixi məcrasının bərpası işi də sürətləndirilmişdir.
“Meliorasiya və Su Təsərrüfatı” ASC-nin sədri Əhməd Əhmədzadə bildirmişdir ki, çaylarda suyun səviyyəsinin tənzimlənməsi məqsədi ilə Tovuzda yeni su anbarı tikiləcəkdir. Prezident İlham Əliyev artıq layihə ilə bağlı müvafiq göstərişlər vermişdir.
Kürdəmir rayonunda da Kür çayı boyunca 32 kilometr məsafədə texnika və yerli sakinlərin köməyi ilə bəndbərkitmə işləri davam etdirilir. Kürdə suyun səviyyəsinin qalxması mexaniki suvarma sistemlərinin də su altında qalmasına səbəb olmuşdur.
Hazırda təsərrüfatlara suyun tam şəkildə çatdırılması və su qıtlığının arada qaldırılması məqsədilə sifonlar və sutəmizləyici qurğulardan istifadə edilir.
Bölmənin digər xəbərləri
