TƏBİİ FƏLAKƏT NƏTİCƏSİNDƏ DAŞQINDAN ƏZİYYƏT ÇƏKƏN RAYONLARDA KOMPLEKS İŞLƏR DAVAM ETDİRİLİR
Saatlı, 29 may (AZƏRTAC). Təbii fəlakət nəticəsində daşqından əziyyət çəkən rayonlarda kompleks işlər davam etdirilir. Görülən tədbirlər nəticəsində Kür və Araz çaylarında suyun səviyyəsi azalmışdır.
Xəbər verildiyi kimi, bir neçə gün əvvəl Saatlı rayonunun Novruzlu kəndini Sarısu gölünün səviyyəsinin qalxması nəticəsində su basmışdr.
Operativ qərargahdan bildirmişlər ki, bu ərazilərdə suyun səviyyəsi ötən günlərə nisbətən aşağı düşmüşdür. Burada suyun səviyyəsinin enməsinin əsas səbəblərindən biri Sarısu gölünün Saatlı rayonu ərazisində yarılan bəndindən suyun Araz çayı istiqamətinə axıdılmasıdır. Bütün bunlara baxmayaraq təhlükə yarana biləcək ərazilərdə bəndbərkitmə işləri davam etdirilir. Burada əsasən Müdafiə Nazirliyinin əsgərləri gecə-gündüz fasiləsiz olaraq çalışırlar. Qoruyucu bəndlərdə intensiv bəndbərkitmə işləri aparılır. İşlərə yerli icra hakimiyyətinin qüvvələri və kənd sakinləri də cəlb olunmuşlar.
Rayon sakinləri təbii fəlakətin nəticələrinin aradan qaldırılması ilə bağlı görülən tədbirlərə görə minnətdarlıqlarını bildirirlər.
İmişli, Saatlı, Sabirabad və Hacıqabul rayonlarında ümumi vəziyyət stabildir.
Bölmənin digər xəbərləri
