TƏBİİ FƏLAKƏT ŞAMAXININ 4 KƏNDİNƏ CİDDİ ZİYAN VURMUŞDUR
Şamaxı, 21 may (AZƏRTAC). Mayın 20-də gündüzdən başlayan və gecə saat 24.00-dək davam edən leysan yağışlar nəticəsində yaranan sel suları Şamaxı rayonunun Talışnuru, Ərçiman, Qonaqkənd və Pirbəyli kəndlərində həyat ritmini pozmuş, əkin sahələrinə, mal-qaraya, elektrik və yol təsərrüfatlarına xeyli ziyan vurmuşdur.
Rayon fövqəladə hallar komissiyasından bildirmişlər ki, sel suları onlarla hektar əkin sahəsini basmış, 105 baş davarı, 7 baş qaramalı, 15 arı ailəsini aparmışdır. Təbii fəlakət nəticəsində elektrik dirəklərində və xətlərində baş verən qəza nəticəsində kəndlərin enerji təchizatı dayandırılmış, Talışnuru və Ərçiman kəndlərinə gediş-gəliş dayanmışdır.
Mayın 21-i səhər tezdən yaradılmış operativ komissiya təbii fəlakət zonasında olmuş, təbii fəlakətin nəticələrinin aradan qaldırılması üçün tədbirlərin icrasına başlanılmışdır. Günün ikinci yarsınadək Qonaqkənddə elektirik enerjisinin bərpası təmin olunmuşdur. Talışnuru və Ərçiman kəndlərinin enerji təchizatı isə günün sonunadək təmin olunacaqdır.
Hazırda ayrılmış texnika və işçi qüvvəsi Ərçiman və Talışnuru kənd yollarının bərpası ilə məşğuldur. Yaxın vaxtlarda hər iki kəndə gediş-gəliş bərpa ediləcəkdir.
Komissiya sakinlərə dəyən ziyanın dəqiqləşdirilməsi məqsədi ilə işləri davam etdirir.
Bölmənin digər xəbərləri
