TƏBİİ FƏLAKƏT ZONASINDA VƏZİYYƏT STABİLLƏŞMƏYƏ DOĞRU GEDİR
Sabirabad, 6 iyun (AZƏRTAC). Hazırda təbii fəlakət zonasında vəziyyət stabilləşməyə doğru gedir. Heç bir təhlükə gözlənilmir.
Kür çayının daşması nəticəsində daşqınlardan əziyyət çəkən rayonlarda Prezident İlham Əliyevin göstərişlərinə uyğun olaraq kompleks işlər davam etdirilir. Əsasən evlərdən və həyətyanı sahələrdən suyun çəkilməsi prosesi aparılır. Ərazidə aidiyyatı qurumların canlı qüvvəsi və texnikası çalışır.
Təbii fəlakətdən ziyan çəkən insanlara hal-hazırda yüksək səviyyəli səhiyyə xidməti göstərilir. Bundan ötrü Bakıdan yüksək ixtisaslı həkimlərdən təşkil olunmuş briqadalar fəlakət zonasına ezam olunur. Eləcə də yaxın tibb müəssisələrində münasib şərait yaradılmışdır.
Araz çayının tarixi qolundan gedən suyun Biləsuvar və Cəlilabad rayonlarının ərazilərindən keçərək dənizə ötürülməsi üçün də təxirəsalınmaz tədbirlər görülür. Bu sırada Ələt-Astara magistralının 93-cü kilometrliyində yeni körpü tikilir.
Kür və Araz çaylarında suyun səviyyəsinin enməsi də müşahidə olunur. Bununla yanaşı, fəlakət zonasında bəndvurma, sahilbərkitmə işləri də davam etdirilir.
Kürün daşması nəticəsində köçürülərək Şirvan şəhərində çadır şəhərciyində yerləşdirilən əhali artıq evlərinə qayıdır. Hazırda 400-ə yaxın Sabirabad rayon sakini evinə qayıtmışdır. Onlar üçün hər cür şərait yaradılmışdır.
Qeyd edək ki, Sarısu gölü ətrafında da vəziyyət yaxşılaşır. Aidiyyəti orqanların ərazidə xeyli texnikası və canlı qüvvəsi işləyir, vəziyyət tam nəzarət altındadır.
Ümumiyyətlə, Kür çayının daşması nəticəsində ziyan çəkmiş rayonlarda yaranmış vəziyyətin tez bir zamanda aradan qaldırılması istiqamətində zəruri tədbirlər görülür.
Bölmənin digər xəbərləri
