TOMRİS AZƏRİ: DÜNYADA YAŞAYAN AZƏRBAYCANLILAR ÖZ FƏALİYYƏTLƏRİNİ DAHA YAXINDAN ƏLAQƏLƏNDİRMƏLİDİR
II qurultayı qarşısında
TOMRİS AZƏRİ: DÜNYADA YAŞAYAN AZƏRBAYCANLILAR ÖZ
FƏALİYYƏTLƏRİNİ DAHA YAXINDAN ƏLAQƏLƏNDİRMƏLİDİR
Dünya azərbaycanlılarının II qurultayında iştirak edəcək həmvətənlərimizin bir qrupu da ABŞ-da yaşayan azərbaycanlılar olacaqdır. Nümayəndə heyətinin başçısı, Amerikadakı Azərbaycan Cəmiyyətinin prezidenti Tomris Azəri Bakıya səfəri ərəfəsində AZƏRTAC-ın xüsusi müxbiri ilə söhbətində qurultaya bəslədiyi böyük ümidlərini ifadə etmişdir.
- Tomris xanım, ABŞ-da yaşayan azərbaycanlıları II qurultayda təmsil edəcək nümayəndə heyəti kimlərdən ibarətdir?
- Bəri başdan deyim ki, nümayəndə heyətimiz təkcə Azərbaycan mənşəli amerikalılardan ibarət deyildir. Xarici Ölkələrdə Yaşayan Azərbaycanlılarla İş üzrə Dövlət Komitəsinin dəvəti ilə Bakıya italyan, yəhudi, türk və digər mənşəli amerikalılar da gedirlər. Amma onların hamısı Amerikadakı Azərbaycan Cəmiyyətinin üzvlərinə qoşularaq, vahid bir qrup şəklində qurultayın işində iştirak etmək istəklərini bildiriblər. Ona görə deyə bilərəm ki, nümayəndə heyətimiz Amerika azərbaycanlılarından və Azərbaycanın dostlarından ibarətdir.
- Dünya azərbaycanlılarının ilk qurultayı xatirinizdə necə qalıb? - Mən ilk qurultayın da iştirakçısı idim və orada çıxış etmişdim. Prezident Heydər Əliyevin təşəbbüsü ilə keçirilmiş həmin qurultay dünya azərbaycanlılarını bir araya gətirməkdə çox böyük rol oynamışdır. İlk qurultaydan yadımda qalan ən əziz xatirələr də elə mərhum Prezident Heydər Əliyevlə bağlıdır. Onun salonda əyləşib bizim hamımıza maraqla qulaq asmasını yaxşı xatırlayıram. Heydər Əliyevin birinci qurultayda söylədiyi nitqi isə biz həyəcansız dinləyə bilmirdik. Onun hər sözü, hər bir ifadəsi bizi azərbaycanlı olmağımızla fəxr etməyə vadar edirdi. Şərəfimizə verdiyi ziyafətlə, bizimlə ünsiyyətlə, söhbətləri ilə Prezident Heydər Əliyev bütün azərbaycanlılara doğma evlərində olduqlarını hiss etdirirdi. Biz Azərbaycana dərindən bağlı olduğumuzu bir daha anladıq. Bütün bunlardan ruhlanaraq Azərbaycan üçün daha da böyük işlər görmək arzusu ilə yaşadığımız ölkələrə qayıtdıq.
- İlk qurultaydan sonra keçən müddətdə konkret işlərin görüldüyünü hiss edirsinizmi?
- Şübhəsiz. Dünya azərbaycanlılarının I qurultayında tanış olduğumuz soydaşlarımızla daim əlaqə saxlayırıq. Xarici Ölkələrdə Yaşayan Azərbaycanlılarla İş üzrə Dövlət Komitəsi yaradılmışdır. Bu, çox böyük təşəbbüs idi. Nazim İbrahimovun başçılıq etdiyi Dövlət Komitəsi bizi birləşdirmək istiqamətində uğurlu iş görür. Bizim təşkilatın Komitə ilə yaxın əlaqələri var. Bütün layihələrimizdə, fəaliyyətimizdə onların dəstəyini hiss edirik. Bizə kömək etməyə çalışırlar. Eyni zamanda, hesab edirəm ki, Dövlət Komitəsinin işinin səmərəli olması üçün dünya azərbaycanlıları da öz köməyini göstərməlidirlər. Amma bu, hələ başlanğıcdır. Komitənin gələcək işinin daha uğurlu olacağına inanıram.
- Layihələrdən söz açdınız. II qurultayda hansısa təkliflərlə çıxış edəcəksinizmi?
- İmkanlarımızdan səmərəli istifadə edib Azərbaycanın maraqlarını daha geniş şəkildə təmsil etmək üçün bir sıra layihələrimiz var. Məsələn, Amerikanın Vaşinqton və Nyu-York kimi böyük şəhərlərində mütəmadi toplantılar keçirmək istəyirik. Bu toplantılara biz Amerikada yaşayan digər diasporların nümayəndələrini də dəvət etməliyik. Amerikalıların bir çoxunun Azərbaycanın ABŞ üçün geostrateji əhəmiyyəti barədə tam təsəvvürü yoxdur. Belə toplantılar vasitəsilə biz Azərbaycanın siyasətini, onun beynəlxalq birlikdəki yerini daha geniş təbliğ edə bilərik. Daha bir layihə Amerikada “Azərbaycan Mərkəzləri”nin yaradılması ilə bağlıdır. Amerikaya gələn azərbaycanlı mühacirlər, burada oxuyan tələbələrimiz və yaxud çoxdan yaşayan soydaşlarımız bizə kömək üçün müraciət edirlər. Kimsə Azərbaycan dilini öyrənmək istəyir, kiməsə məsləhət lazımdır və s. İmkanlarımız məhdud olduğundan, onlara heç də həmişə kömək edə bilmirik. ABŞ-da “Azərbaycan Mərkəzləri” yaratmaqla biz onları bir növ Azərbaycan evlərinə çevirə bilərik ki, qapıları soydaşlarımıza həmişə açıq olsun.
-Son zamanlar ABŞ-dakı Azərbaycan diasporu hansı işləri görüb? - Fəaliyyətimizi mədəniyyətimizi, tariximizi, Azərbaycan Respublikasının mövqeyini Amerikaya tanıtmaq istiqamətində qurmuşuq. Konqreslə işimizi davam etdiririk. Qardaşlaşmış şəhərlər proqramını sürətləndirmişik. Bu yaxınlarda Gəncə-Nyuark, Quba-Bruklin, Bakı-Hyuston kimi qardaşlaşmış şəhərlər sırasına Naxçıvan və Florida ştatındakı şəhərlərdən biri də qoşulacaqdır. Etiraz aksiyaları fəaliyyətimizin bir qolu olaraq qalmaqdadır. BMT-nin iqamətgahı, Ermənistanın diplomatik nümayəndəlikləri qarşısında tariximizin qanlı günlərini anırıq. Məsələn, ötən ay Xocalı faciəsinin ildönümündə Cəmiyyətimizin üzvləri Vaşinqtonda Ermənistan səfirliyi qarşısında böyük aksiya keçirmişlər.
Arzularımız, layihələrimiz çoxdur. Mən Bakıya böyük ümidlərlə gedirəm. Dünyada yaşayan soydaşlarımızla yeni tanışlıqlar işimizi daha yaxından əlaqələndirməyə və bütün dünyada yaşayan azərbaycanlıların sözünü birlikdə deməyə kömək edəcəkdir.
Nümayəndə heyətimiz qurultayda bəyan edəcək ki, biz Azərbaycanın maraqlarını qorumağa həmişə hazırıq və Prezident İlham Əliyevin apardığı siyasəti dəstəkləyəcəyik.
Bölmənin digər xəbərləri
