Bakı, 8 avqust, AZƏRTAC

Tovuz rayonunun 110/35/10 kilovoltluq “Qovlar” və 110/35/6 kilovoltluq “Tovuz” yarımstansiyalarında yenidənqurma işləri davam edir.

“Azərişıq” ASC-dən AZƏRTAC-a bildirilib ki, rayonun Papaqçılar, Ağdam, Qaradaş, Ağbaşlılar, Mürkülü, Səfərli, Qandallar, Əyyublu olmaqla 8 kəndində elektrik şəbəkəsinin yenidən qurulması işləri başa çatdırılıb.

Digər kəndlərdə istismar müddətini başa vurmuş 0,4; 6 və 10 kilovoltluq dayaqlar və elektrik veriliş xətləri, eləcə də transformator məntəqələri tam yenidən qurulur. Hazırda Aşağı Quşçu, Ağbulaq və Göyəbaxan olmaqla 3 kənddə yenidənqurma işləri davam etdirilir. Yaxın gələcəkdə daha 7 kəndin elektrik şəbəkəsinin yenilənməsi işlərinə başlanılacaq.

Yenidənqurma işləri çərçivəsində 3 minə yaxın abonentin yaşadığı Əyyublu kəndinin də elektrik şəbəkəsi yenidən qurulub. Kəndin ərazisində 29 yeni transformator məntəqəsi, eləcə də müasir sayğaclar quraşdırılıb. 0,4 və 10 kilovoltluq dayaqlar basdırılıb, Özünüdaşıyan İzolyasiyalı Naqillər (ÖİN) çəkilib.