Tramp ittihamdan sonra seçki kampaniyası üçün 15,4 milyon dollar yığıb
Bakı, 17 aprel, AZƏRTAC
ABŞ-ın sabiq prezidenti Donald Tramp Nyu-York məhkəməsinin ona qarşı ittiham irəli sürməsindən sonra iki həftə ərzində seçki kampaniyası üçün 15,4 milyon dollar ianə yığıb.
AZƏRTAC xəbər verir ki, CNN telekanalı bu barədə Donald Trampın seçki qərargahına istinadla məlumat yayıb.
Qərargah nümayəndələrinin fikrincə, ianələrin artması tərəfdarlarının sabiq prezidentin ətrafında sıx birləşməsinin göstəricisidir. Telekanal qeyd edir ki, hüquqi problemlər Donald Trampa həm siyasi, həm də maliyyə planında xeyir gətirib.
Xatırladaq ki, martın 30-da Nyu-Yorkun böyük jürisi aktrisa Stormi Denielsə pul ödəmək üçün “Trump Organization” kompaniyasının maliyyə sənədlərinin saxtalaşdırması ilə bağlı Donald Trampa qarşı ittihamın irəli sürülməsini dəstəkləyib. İttihama görə, vəkil Maykl Koen 2016-cı ildə keçirilən seçki kompaniyası zamanı aktrisaya Donald Trampla əlaqəsi barədə məlumat yaymaması üçün 130 min dollar ödəyib. Nyu-Yorkun Cənub dairə prokurorluğunun versiyasına görə, sabiq prezident sonradan “Trump Organization” kompaniyasının sənədlərini saxtalaşdırmaqla ödənilən vəsaiti kompensasiya edib.
Bölmənin digər xəbərləri
