“Tullantıları hədiyyələrə dəyiş” festivalı keçiriləcək
Bakı, 13 mart, AZƏRTAC
Martın 15-də tullantıların düzgün idarə olunması sahəsində əhalinin maarifləndirilməsi, çeşidləmə vərdişlərinin stimullaşdırılması məqsədilə Ekologiya və Təbii Sərvətlər Nazirliyinin təşkilatçılığı, Yasamal Rayon İcra Hakimiyyətinin və müxtəlif tərəfdaş qurumların dəstəyi ilə “Tullantıları hədiyyələrə dəyiş” festivalı keçiriləcək.
AZƏRTAC xəbər verir ki, festival çərçivəsində vətəndaşlar ümumi tutumu minimum 35 litr olan plastik butulka, 5 litr tutumu olan şüşə butulka/banka və ya 10 ədəd işlənmiş batareya təhvil verərək, əvəzində müxtəlif hədiyyələr (müxtəlif növ ağac tingləri, ekoçantalar, kitablar və s.) əldə edə biləcəklər.
Qeyd edək ki, maraqlı viktorinalar, müxtəlif master- klasların da keçiriləcəyi festivalda tullantıları gətirərək həm təbiətə töhfə verə, həm də müxtəlif hədiyyələr qazana bilərsiniz.
Tədbir tullantıların qarşısını almaq, resurslardan daha səmərəli istifadə etmək, tullantıları mənbəyində toplayıb təkrar emala yönləndirmək məqsədilə keçirilir.
Festival martın 15-də saat 15:00-da Yasamal rayonu, Hüseyn Cavid parkında təşkil olunacaq.
Bölmənin digər xəbərləri
