TURİZM SAHƏSİNDƏ AZƏRBAYCAN-KÜVEYT ƏMƏKDAŞLIĞININ ƏSASI QOYULMUŞDUR
Nazirliyin mətbuat xidmətindən AZƏRTAC-ın müxbirinə bildirmişlər ki, səfər, əsasən, turizm sahəsində Azərbaycan-Küveyt əməkdaşlığının inkişafı üçün zəmin yaratmaq, ölkəmizin turizm sahəsinə Küveyt sərmayəsi cəlb etmək məqsədi daşımışdır. Nazir Küveytin Baş naziri şeyx Sabah əl-Əhməd əl-Cabir, Milli Məclisin sədri Casim Məhəmməd əl-Xərafi, informasiya naziri, İdman və Gənclər Komitəsinin sədri şeyx Fəhd əl-Cabir əl-Sabah, Ticarət-Sənaye Palatasının sədri Əli Qənim ilə görüşmüşdür.
Görüşlərdə ikitərəfli əməkdaşlığın inkişafı, Bakı-Küveyt aviareysinin açılması məsələləri müzakirə olunmuş, ölkəmizin turizm potensialı, Ermənistan-Azərbaycan, Dağlıq Qarabağ münaqişəsi, İslam Konfransı Təşkilatının üzvü olan ölkələrin xarici işlər nazirlərinin gələn ilin iyununa, turizm nazirlərinin isə sentyabr ayına nəzərdə tutulmuş Bakı konfransları barədə məlumat verilmişdir.
Səfərin yekunlarına əsasən, Azərbaycan və Küveyt hökumətləri arasında turizm sahəsində əməkdaşlıq haqqında Sazişin layihəsi paraflanmışdır.
Əbülfəz Qarayev canlı yayımla Küveyt dövlət telekanalının “Sabahın xeyir, Küveyt” proqramına müsahibə vermişdir.
