TÜRKİYƏDƏ 31 MART - SOYQIRIM GÜNÜ İLƏ ƏLAQƏDAR AKSİYA KEÇİRİLMİŞDİR
Bakı, 1 aprel (AZƏRTAC). Türkiyənin İzmir şəhərində fəaliyyət göstərən Azərbaycan Mədəniyyət Evi və Həmrəylik Cəmiyyəti İzmir universitetlərində təhsil alan azərbaycanlı tələbələrlə birlikdə 31 mart - Azərbaycanlıların soyqırım günü ilə əlaqədar İzmirin mərkəzi Konak meydanında etiraz aksiyası keçirmişdir. Aksiyada Azərbaycan Mədəniyyət Evi və Həmrəylik Cəmiyyətinin sədri Turqut Arat çıxış etmiş, ermənilərin azərbaycanlılara qarşı törətdiyi soyqırımı və terror aksiyaları barədə ətraflı məlumat vermişdir. O demişdir ki, Türkiyədə Ermənistandan üzr istəyənlərin əslində Azərbaycandan üzr istəməsi lazımdır. Cəmiyyətin sədr müavini, İzmirdə təhsil alan azərbaycanlı tələbə Cavid Əliyev isə bildirmişdir ki, ermənilər Azərbaycan xalqına 1828-ci ildən bəri soyqırımı həyata keçirir. Təəssüf ki, Türkiyəni guya ermənilərə qarşı soyqırımı törətməkdə günahlandıranlar azərbaycanlılara qarşı yüz illər boyu davam edən qətliamlara göz yumurlar.
Tədbirdə 31 mart soyqırımından bəhs edən fotoşəkillər sərgilənmiş, bröşürlər paylanmışdır. Aksiyanın sonunda bəyanat qəbul edilmişdir.
Diaspor İlə İş üzrə Dövlət Komitəsindən bildirmişlər ki, 31 mart - Azərbaycanlıların soyqırım günü ilə bağlı Türkiyə-Azərbaycan Dərnəkləri Federasiyası da bəyamat yaymışdır. Bəyanatda deyilir ki, bu soyqırımını törədənləri, onlara dəstək verənləri, tarixi saxtalaşdırıb ikili standartlardan çıxış edən erməni diasporunun yalanlarına uyanları qınayırıq.
######
Bölmənin digər xəbərləri
