Türkiyədə təşkil olunacaq “İstanbul Publishing Fellowship” proqramında Azərbaycan nəşriyyatından bəhs ediləcək
İstanbul, 5 mart, AZƏRTAC
Türkiyə Media Yayım Peşə Birliyi (TBYM) tərəfindən keçiriləcək beynəlxalq “İstanbul Publishing Fellowship” (İstanbul Nəşriyyat Təqaüdü) proqramı çərçivəsində bu il ilk dəfə təşkil ediləcək “diqqət mərkəzindəki ölkə” mövzusu çərçivəsində Azərbaycan nəşriyyatından bəhs ediləcək. Bu bölümün təşkilinin əsas məqsədi türkcənin nə qədər köklü olduğunu tanıtmaq və dilimizə beynəlxalq marağı artırmaqdır.
AZƏRTAC xəbər verir ki, bu il altıncı dəfə baş tutacaq tədbirin onlayn və məhdud sayda iştirakçı ilə üz-üzə keçirilməsi planlaşdırılır. 70-i xarici, 130-u yerli olmaqla, ümumilikdə 300 nəşriyyatın iştirak edəcəyi tədbirdə Türkiyə və Azərbaycandan ümumilikdə 120 yayımçı iştirak edəcək.
Türkiyənin Mədəniyyət və Turizm Nazirliyinin dəstəyi, Anadolu Agentliyinin qlobal rabitə tərəfdaşlığı ilə hazırlanacaq toplantıda yayım əlaqələrinin gücləndirilməsi, iki ölkənin mədəni həyatına veriləcək töhfələr və bu istiqamətdə həyata keçiriləcək tədbirlərin təfərrüatları müzakirə olunacaq.
Tədbir martın 9-11-də reallaşacaq.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
