TÜRKİYƏDƏ YERLİ İDARƏETMƏ ORQANLARINA SEÇKİLƏR KEÇİRİLMİŞDİR

29.03.2004 [22:43]
Çap et
A⁺ A^-

AZƏRTAC-ın xüsusi müxbirinin Ankaradan verdiyi xəbərə görə, ötən bazar Türkiyədə yerli idarəetmə orqanlarına seçkilər keçirilmişdir. Bəzi lokal gərginliklər nəzərə alınmasa, seçkilər zamanı ciddi qanun və asayiş pozuntuları baş verməmişdir. Qeyri-rəsmi ilkin məlumatlara görə, seçkilərdə qeydə alınan seçicilərin 67 faizi iştirak etmişdir. Ankarada Ədalət və İnkişaf Partiyasının namizədi Məlik Gökçək, İzmirdə Cümhuriyyət Xalq Partiyasının namizədi Əhməd Priştina yenidən şəhər bələdiyyəsinin başçısı vəzifəsinə seçilmişlər. İstanbulda isə ən çox səs Ədalət və İnkişaf Partiyasının namizədi Kadir Topbaşa verilmişdir.

Türkiyədəki siyasi şərhçilər bu seçkilərdə hakimiyyətdə olan Ədalət və İnkişaf Partiyasının böyük qələbə qazandığını nəzərə çarpdırır. Belə ki, keçən seçkilərə nisbətən iqtidar partiyasının aldığı səslər təxminən 10 faiz artmışdır. Bununla yanaşı, müxalifətdəki Cümhuriyyət Xalq Partiyasının aldığı səslər isə müəyyən miqdarda azalmışdır. Keçmiş seçkilərə görə, daha çox səs toplayan digər iki partiya isə Doğru Yol və Milliyyətçi Hərəkat partiyalarıdır.

Seçkilərin rəsmi nəticələri bir neçə gündən sonra açıqlanacaqdır.