TÜRKİYƏLİ MÜŞAHİDƏÇİLƏR AZƏRBAYCANDA PARLAMENT SEÇKİLƏRİNİN BEYNƏLXALQ STANDARTLARA UYĞUN KEÇİRİLDİYİNİ BƏYAN ETMİŞLƏR
Akkan Suver seçkilərdən dərhal sonra bu tədbirin keçirilməsinin məqsədini açıqlayaraq demişdir ki, biz seçkilərin beynəlxalq standartlara uyğun təşkil olunduğunu alqışlayırıq. Müşahidələrimizdən məlum oldu ki, müxtəlif məntəqələrdə çalışanlar heç bir təzyiqlə, ciddi qanun pozuntuları ilə üzləşməmiş, vəzifələrini şəffaflıq şəraitində yerinə yetirmişlər. Zaqatala, Gəncə, Şamaxı, Salyan, Sumqayıt, Lənkəran, İsmayıllı, Göyçay, Abşeron, Bakının Əzizbəyov və Qaradağ rayonlarında seçki prosesini izlədik, müxtəlif partiya təmsilçilərinin seçkilərdən şikayətçi olmadıqlarını öyrəndik. Hər bir məntəqədə şəffaflıq və qarşılıqlı hörmət hiss olunurdu. Biz bəzi namizədlərlə də görüşmək imkanı qazandıq, onlarla üz-üzə söhbət etdik. Şikayətlərinin olub-olmaması barədə suallarımıza aldığımız cavablarda şəffaf və demokratik bir seçkinin keçirildiyi, bütün şərtlərin yerinə yetirildiyi ifadə olundu. Bir daha vurğulamaq istəyirik ki, Azərbaycan Respublikasının Mərkəzi Seçki Komissiyası bu seçkini müvəffəqiyyətlə başa çatdırmışdır. Bu işlə məşğul olan hər kəsi təbrik edir və əminik ki, nəticələr Azərbaycan xalqının xeyrinə olacaqdır.
“Müxalifət nümayəndələri, partiya təmsilçiləri iddia edir ki, iqtidar sizi ələ almışdır” sualına cavab verən Akkan Suver demişdir:
- Bizim vəqf BMT-nin iqtisadi-sosial sahədə Məsləhətləşmə Şurasının üzvüdür. Biz Azərbaycana müstəqil müşahidəçilər kimi gəlmişik. Azərbaycan seçkiləri izlədiyimiz sayca 22-ci ölkədir. Almaniyada da müşahidəçi olmuşuq. Lakin biz “Bir millət, iki dövlətik”. Ona görə buraya böyük nümayəndə heyəti ilə gəldik. Aramızda indiki və sabiq millət vəkilləri, nazirlər, istefada olan generallar, Cümhuriyyət Xalq Partiyasından iki deputat və bələdiyyə sədrləri var. Biz Azərbaycandakı seçkilərə böyük önəm veririk. Qardaş ölkəyə ABŞ və Rusiyadan sonra ən böyük müşahidəçi qrupu Türkiyədən gəlmişdir. Bilməlisiniz ki, Türkiyədə barmaqlarımıza vurulan boyanın rəngi bir ay getmir. Bu, Prezidentin də, sürücünün də barmaqlarında qalır. Bizim seçki qutularımız hələ köhnədənqalma taxtadandır. Sizdə isə şəffafdır. Bu da çox gözəldir və tərəqqinin, inkişafın əlamətidir. Biz ölkəmizdə bunları söyləyəcəyik. 14 yaşlı müstəqil Azərbaycan beynəlxalq normalara uyğun seçki keçirmişdir.
Vəqfin baş katibi, qəzetçi Engin Köklüçinar demişdir ki, mən müxalifət mətbuatında çalışıram. Məni Türkiyə hökuməti ələ ala bilmirsə, Azərbaycan hökuməti necə ələ alacaqdır?! İndiyədək bizi heç kim ələ almamışdır və ala da bilməz. Qaradağ rayonunda bir çox məntəqələrdə oldum, səsverməni izlədim. Onu bildirirəm ki, hörmətli sədrlə mənim fikirlərim arasında heç bir fərq yoxdur. Sabah “Günəş” qəzetində də yazacağam. Türkiyədən gəlmiş heyətin Azərbaycan hökumətinin ələ alması məsələsi doğrudan da buradakı müxalifətin ortaya atdığı mənasız fikirdir. Əvvəlcədən qəzetlərdə yazırdılar ki, bu seçki prosesinə müdaxilə olacaq, şəffaf, demokratik keçməyəcəkdir. Mən burada seçkilərin hətta Türkiyədən də gözəl keçdiyini iftixarla deyirəm. Türkiyənin bir çox yerində olduğundan da şəffaf, demokratik seçki keçirilməsini etiraf etmək, hələ bizim ələ alınmağımız demək deyildir. Azərbaycanlı qardaşlarıma hörmət edir, onlara bu seçkinin qiymətini bilmələrini məsləhət görürəm.
Böyük Millət Məclisinin deputatı Şamil Ayrım isə demişdir ki, müxalifətin bizi suçlaması məni son dərəcə narahat etmişdir. On ildir parlamentdə təmsil olunuram. Əslən azərbaycanlıyam. Azərbaycanın müstəqil dövlət kimi yaşamasından fəxr edirəm. Vəqfimiz Azərbaycanın daxili işlərinə qarışmaq marağında deyildir. Ancaq Azərbaycanın dünya səviyyəli demokratiya qazanması üçün hər zaman qardaş ölkənin yanındayıq. Bu, bizim üçün önəmlidir. Səslənən iddiada olanlar bu deyilənləri eşitdikcə Azərbaycan həqiqətlərini görəcəklər. Heyətimizdən heç kəsi kimsə ələ ala bilməz. Çünki qrupumuzda özünü təsdiqləmiş, təcrübə qazanmış insanlar vardır. Bu seçkilər Azərbaycan üçün faydalı olacaqdır. Hamımız bunu görəcəyik.
Bölmənin digər xəbərləri
