Türkiyənin ASELSAN şirkəti mobil telefon istehsalını bərpa edəcək
Ankara, 20 may, AZƏRTAC
Türkiyənin ASELSAN şirkəti 2027-ci ildə mobil telefon istehsalını bərpa etməyi planlaşdırır.
AZƏRTAC xəbər verir ki, 1997-ci ildə Türkiyənin ilk mobil telefonları olan “ASELSAN 1919” modellərinin istehsalına başlayan şirkət yeni müasir smartfonların hazırlanması ilə bağlı “Türk Telekom” telekommunikasiya şirkəti ilə razılıq əldə edib.
Xatırladaq ki, “ASELSAN 1919” modelinin hazırlanmasına hələ 1993-cü ildə başlanılmışdı və bu, Türkiyə istehsalı olan cəmi iki mobil telefon modelindən biri idi.
“ASELSAN 1919” modelinin istehsalına başlanılması ilə Türkiyə həmin dövrdə mobil telefon istehsal edən dünyanın doqquz ölkəsindən birinə çevrilmişdi.
İlkin mərhələdə 500 ədəd mobil telefon istehsal olunub, onların bir hissəsi Azərbaycan və Şimali Kipr Türk Cümhuriyyətinə ixrac edilib.
ASELSAN-ın baş direktoru Ahmet Akyol “Türk Telekom” ilə əldə olunan razılığı şərh edərkən rəhbərlik etdiyi şirkətin müdafiə sənayesi sahəsində qazandığı uğurlara diqqət çəkib.
“Dünyanın müxtəlif bölgələrində baş verən münaqişələr göstərir ki, kommunikasiya infrastrukturu və avadanlıqları milli təhlükəsizliyin ən vacib komponentlərindən biridir. Kommunikasiya texnologiyaları sahəsində təcrübəyə və istehsal imkanlarına malik ASELSAN Türkiyənin ekosisteminin güclü komponentidir. Xüsusilə rabitə sahəsində Türkiyənin idxaldan asılılığını minimuma endirməyi qarşıya məqsəd qoymuşuq”, - deyə o bildirib.
Bölmənin digər xəbərləri
