Türkiyənin Gənclər və İdman Nazirliyinin mütəxəssisi: Azərbaycandan ideyalar əldə etmək mümkündür
Bakı, 15 dekabr, Göyçək Mahmudlu, AZƏRTAC
Gələn il Türkiyə COP tədbirinə, daha geniş ifadə etsək, Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyasına ev sahibliyi edəcək. Biz COP çərçivəsində Azərbaycandan olan mütəxəssislərlə görüş keçirsək, Türkiyədən buraya heyət gəlsə, ya onlayn seminarlar olsa, təcrübələri öyrənər və tətbiq edə bilərik. Biz təşkilatçılıq işlərində gənclərin fəaliyyətinin təşkili baxımından nələr edə biləcəyimizi müəyyənləşdirə bilərik. İlboyu COP31-i dəstəkləyən fəaliyyətləri layihələndirərkən Azərbaycandan ideyalar əldə etmək mümkündür. İqlim davamlılığına nail olmaq üçün həyata keçiriləcək tədbirlərdə və proseslərdə gənclərin iştirakını təmin etmək məqsədilə təklifləri birgə gözdən keçirə və sonra onları icra mərhələsinə keçə bilərik.
Bunu AZƏRTAC-a açıqlamasında Türkiyənin Gənclər və İdman Nazirliyinin gənclər və idman üzrə mütəxəssisi Halil İbrahim Yaylacı deyib.
Azərbaycan və Türkiyənin Gənclər və İdman nazirliklərinin birgə həyata keçirdiyi proqram və layihələrdən bəhs edən Yaylacı əməkdaşlıq çərçivəsində Türkiyə və Azərbaycan gənclərinin əlaqə yaratdıqlarını və "Bir millət, iki dövlət" şüarı altında münasibətlərin daha da dərinləşdiyini qeyd edib. "Eyni proqramları Türk Dövlətləri Təşkilatı (TDT) çərçivəsində də həyata keçirə bilərik. Müxtəlif sahələrdə təcrübəmizi təşkilata, digər üzv ölkələrə ötürə bilərik. TDT-nin gənclər forumu var. Forumda üzv ölkələrin QHT-ləri təmsil olunur. Onların vasitəsilə biz gəncləri bir araya gətirə və sammitlər, təqdimatlar, panellər və bu yaxınlarda Bakıda keçirilən D-8 ölkələrinin Gənclər Dialoqu kimi digər tədbirlər təşkil edə bilərik. Bunlar informasiya fəaliyyəti olduğu üçün şəbəkə yaratmaq mümkün olacaq. TDT-nin gənclər forumunu bu mənada inkişaf etdirmək lazımdır".
Bölmənin digər xəbərləri
