TÜRKİYƏNİN KAYSERİ ŞƏHƏRİNDƏ XOCALI SOYQIRIMI QURBANLARININ XATİRƏSİ ANILMIŞDIR
Ankara, 28 fevral (AZƏRTAC). Ermənilərin Xocalıda törətdikləri qətliamın qurbanlarının xatirəsi Türkiyənin Kayseri şəhərində də anılmışdır.
Şəhərdəki Meydan parkında Xocalı qurbanlarının xatirəsinə ucaldılmış abidənin önünə tər qərənfillər düzülmüşdür. Burada keçirilmiş mitinqdə Türk Təhsil Konfederasiyası Kayseri şöbəsinin sədri Əli İhsan Öztürk bidirimişdir ki, 17 il əvvəl ermənilərin Xocalıda törətdikləri qətliamın acısı hələ də bütün türk dünyasının ürəyini parçalayır. Türkiyə parlamenti bu qətliamı soyqırımı kimi tanıyan qərar qəbul etməlidir. Biz “ermənilərdən üzr istəyənlər”dən də Xocalı ilə bağlı açıqlamalar gözləyirik. Əks təqdirdə, cəmiyyətimiz onların ikiüzlülüyünə lazımi qiymət verəcəkdir.
Türkiyədə Xocalı qətliamının soyqırımı kimi tanınması üçün parlamentə müraciətlərin sayı artır. Türkiyə Strateji Araşdırmalar Mərkəzinin rəhbəri Sinan Oğan Anadolu agentliyinə müsahibəsində bununla bağlı ziyalıların internet kampaniyasına başladıqlarını, gələn il bu kampaniyaya 1 milyondan çox insanın qoşulmasını təmin edəcəklərini bildirmişdir. Onların siyahısı BMT-yə və Avropa İnsan Haqları Məhkəməsinə də göndəriləcəkdir.
Oqtay Bayramov
AZƏRTAC-ın xüsusi müxbiri
Ankara
Bölmənin digər xəbərləri
