Tusk: Polşa Macarıstanı neft-qaz tədarükü marşrutları ilə təmin etməyə hazırdır
Bakı, 20 may, AZƏRTAC
Budapeşt maraqlı olarsa və Rusiyanın enerji resurslarından imtina edərsə, Polşa onu alternativ neft-qaz tədarükü marşrutları ilə təmin etməyə hazırdır.
AZƏRTAC xəbər verir ki, Polşanın Baş naziri Donald Tusk bunu Varşavada macar həmkarı Peter Macyar ilə birgə mətbuat konfransında deyib. “Polşa Macarıstanın enerji təhlükəsizliyinin təmin edilməsində ona kömək etməyə və əməkdaşlığa hazırdır. Biz şaxələndirmə sayəsində çox qısa müddətdə tək bir dövlətdən asılılıqdan qurtula bilmişik”, - deyə Tusk “TVP Info” tərəfindən yayımlanan mətbuat konfransında bildirib.
Polşanın Baş naziri Macarıstanın enerji resurslarının alınması ilə bağlı qərarlarının “onun suveren hüququ” olduğunu da qeyd edib.
Mayın 11-də o vaxt iqtisadiyyat və energetika naziri vəzifəsinə namizəd olan İştvan Kapitan bəyan etmişdi ki, yeni Macarıstan hökuməti Rusiya ilə neft-qaz müqavilələrindən imtina etməyi planlaşdırmır, əksinə, enerji mənbələrini və tədarük marşrutlarını şaxələndirəcək.
Bölmənin digər xəbərləri
