Ukraynada Böyük Britaniyanın hərbi zavodunun açılmasına dair razılıq əldə olunub
Kiyev, 31 may, AZƏRTAC
Ukrayna Prezidenti Volodimir Zelenskinin Britaniyanın “BAE Systems” müdafiə şirkətinin nümayəndələri ilə videogörüşü olub. Həmin şirkət “Challenger” tankları və M777 haubitsaları istehsal edir.
AZƏRTAC xəbər verir ki, bu barədə Volodimir Zelenski feysbuk səhifəsində məlumat verib.
“Biz Ukraynada “BAE Systems” ofisinin, daha sonra isə şirkətin məhsulları üçün təmir və istehsal müəssisələrinin açılması üzrə işə başlamaq barədə razılığa gəldik”, - deyə Zelenski əlavə edib.
O, Ukraynanın müxtəlif növ “BAE Systems” məhsullarının təmiri və istehsalı üçün əsas regional mərkəzə çevrilməyə hazır olduğunu və indi daha çox qlobal əlaqələrdə maraqlı olduğunu bəyan edib.
Qeyd edək ki, “BAE Systems” Böyük Britaniyanın silah, informasiya təhlükəsizliyi və aerokosmik sahələrində inkişaf məsələləri ilə məşğul olan ən böyük müdafiə şirkətidir.
Hərbi məhsulların satışı baxımından, gəlirlərin 96 faizini təşkil edir. Şirkət 2021-ci ildə dünyada 7-ci yeri tutub.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
