Ukraynalı deputatlar Azərbaycana qarşı aparılan çirkin təbliğatı pisləyən bəyanatla çıxış ediblər
Kiyev, 12 oktyabr, AZƏRTAC
Ukrayna Ali Radasının deputatları Azərbaycanın Qarabağ bölgəsində uğurlu lokal antiterror tədbirlərini və orada aparılan reinteqrasiya prosesini dəstəkləyən bəyanatla çıxış ediblər.
AZƏRTAC xəbər verir ki, bəyanatda Qarabağda separatçılar təslim olduqdan sonra Azərbaycana qarşı onu gözdən salmaq məqsədilə mediada qarayaxma kampaniyası başladılıb. Erməni diasporunun radikal ünsürləri və bəzi beynəlxalq KİV-lər nifrət təbliğatını artırır və Azərbaycana qarşı sanksiyalar tətbiq etməyə çağırışlar edirlər.
“Biz bunu qəbuledilməz hesab edirik. Azərbaycan beynəlxalq səviyyədə tanınmış ərazisində tədbirlər görürdü. Qarabağ ərazisində silahlı birləşmələr təslim olduqdan sonra separatçılar tərəfindən qanunsuz gətirilən xeyli silah-sursat və ağır hərbi texnika aşkar edilib.
Qarabağın erməni əhalisinin Ermənistan ərazisinə köçürülməsi zorakı xarakter daşımır, bunu oktyabrın 1-də Qarabağa gələn BMT missiyası və ABŞ Dövlət Departamentinin nümayəndəsi Miller də təsdiqləyib”, - deyə bəyanatda bildirilir.
Həmçinin qeyd olunur ki, bütün Ukrayna separatizmlə mübarizədə Azərbaycanı dəstəkləyir. Hazırda Azərbaycan qalib gəlib və öz tarixi əraziləri üzərində nəzarəti bərpa edib.
Ukraynalı deputatlar Azərbaycana qarşı hər hansı sanksiyaların tətbiqini qətiyyətlə pisləyiblər.
“Rəsmi Bakı Ukraynaya enerji avadanlıqlarının alınması üçün yardım ayırır, yanacaq və dərmanları pulsuz ötürür, Buça və İrpen şəhərlərinin bərpasında iştirak edir, ukraynalı uşaqların reabilitasiyasına kömək edir.
Separatizmə “yox”! Azərbaycana qarşı sanksiyalara “yox”! Kiyev və Bakının qarşılıqlı dəstəyinə “bəli”!”, - bəyanatda qeyd edilir.
Bəyanatı imzalayanlardan biri Ukrayna Ali Radasının deputatı, Ukrayna-Azərbaycan parlamentlərarası dostluq qrupunun həmsədri Valeriy Kolyux AZƏRTAC-a açıqlamasında bildirib ki, Ukrayna Azərbaycanın haqq mübarizəsində onun yanındadır.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
