Ukraynanın “AvtoBiznesTur” jurnalı AzərTAc-ın Kiyevdəki xüsusi müxbirinin məqaləsini dərc etmişdir
Bakı, 14 mart (AZƏRTAC). Ukraynanın populyar “AvtoBiznesTur” jurnalının mart nömrəsində AZƏRTAC-ın Kiyevdəki xüsusi müxbiri Zeynal Ağazadənin “Ümumdünya turizm- kompası istiqamət göstərir Azərbaycan!” sərlövhəli məqaləsini dərc etmişdir.
“Bizə, Azərbaycana gəlin, hər şeyi öz gözlərinizlə görərsiniz!” - material bu sözlərlə başlanır. Məqalədə deyilir ki, Azərbaycanda turizmin inkişafı dövlət siyasətinin prioritet istiqamətlərindən biridir. Ölkədə 2010-2014-cü illər üçün nəzərdə tutulmuş Dövlət Proqramı qəbul edilmişdir, 2011-ci il isə Azərbaycan Respublikasının Prezidenti İlham Əliyevin Sərəncamı ilə Turizm ili elan edilmişdir”.
Məqalənin müəllifi xatırladır ki, Azərbaycan Cənubi Qafqazın bu ölkəsini turizm üçün cazibədar edən müəyyən üstünlüklərə malikdir. Birincisi, o, Avropa ilə Asiyanın qovuşuğunda yerləşir, onun ənənələri, mədəniyyəti, arxitekturası üzvi şəkildə birləşmiş qərb və şərq mədəniyyətlərinin sintezindən ibarətdir. İkincisi, planetimizin 11 mövcud iqlim zonasından 9-u Azərbaycan ərazisində vardır. Odur ki, burada subtropik bitkilərdən tutmuş yüksək dağ çəmənliklərinədək hər şey vardır. Burada dəniz sahillərində qızmar günəş altında qaralmaq, yaxud balıq tutmaq, coşqun dağ çaylarında ekstrim təşkil etmək və ya qarlı dağ yamaclarında xizəklə sürüşmək, bir çox müalicəvi bulaqlarda sağlamlığını bərpa etmək və ya neftlə müalicə kursu keçmək, dəvələrdə gəzmək, vulkan kraterlərinə tamaşa etmək, qədim mis qab-qacaq hazırlanan uca dağ kəndinə qalxmaq, məşhur Azərbaycan xalçalarının naxışlarının necə yarandığını öz gözlərinlə görmək olar. Gözəl təbiət, saysız-hesabsız qədim abidələr, heyrətamiz etnoqrafik rəngarənglik, yerli sənətkarların və kulinarların məharəti ən təcrübəli turisti belə valeh edəcəkdir.
Son illər Azərbaycanda turizmin inkişafına dair bir sıra proqramlar həyata keçirilmiş, yeni turist marşrutları müəyyənləşdirilmişdir.
Bir çox xarici investorlar və elit mehmanxana biznesinin nümayəndələri Azərbaycanda böyük turizm potensialı görürlər.
... Bakıya gəlmiş Ümumdünya Turizm Təşkilatının (ÜTT) baş katibi Taleb Rifai jurnalistlərlə görüşündə demişdir ki, Azərbaycanda turizm sürətlə inkişaf edir. Dünya ölkələrində böhran hökm sürdüyü bir zamanda 2011-ci ilin birinci yarısında Azərbaycana gəlmiş turistlərin sayı 15 faiz artmışdır. Bu isə dünyanın digər ölkələri ilə müqayisədə yüksək göstəricidir. Ümidvarıq ki, bu artım 2012-ci ildə də davam edəcəkdir. T.Rifai qeyd etmişdir ki, ÜTT Azərbaycanın turizm sektorunun inkişafına həmişə kömək göstərməyə hazırdır.
Materialda deyilir: Bu gün Azərbaycan paytaxtı mühüm hadisə - “Eurovision-2012” müsabiqəsi ərəfəsindədir. Bakı Avropanın son mahnı müsabiqəsində Azərbaycan dueti Eldar Qasımovun və Nigar Camalın qələbəsindən sonra bu müsabiqəni keçirmək hüququ qazanmışdır. Qonaqları layiqincə qarşılamaq, bu mahnı bayramını unudulmaz və təkrarolunmaz bir hadisəyə çevirmək - bu gün respublikanın qarşısında duran vəzifə məhz budur.
Hazırda Bakıda demək olar ki, addımbaşı tikinti ilə qarşılaşırsan. Şəhərin təkrarolunmaz simasını təşkil edən XIX əsrin əvvəllərinə aid binalar bərpa edilir, onlara müasir materiallardan üzlük çəkilir, özü də nadir arxitektura koloriti qorunub saxlanılır. Həmin binalarla yanaşı “xay-tek” üslubunda müasir binalar ucaldılır. Bu binalarda mehmanxanalar, kafelər, restoranlar olacaqdır.
“Biz elə etməliyik ki, Bakı əbədi qədim və əbədi gənc şəhər kimi bütün qonaqları valeh etsin” - Prezident İlham Əliyevin bu sözləri hər gün həyata keçirilir.
İllüstrasiyalarla zəngin olan materialda qeyd edilir ki, “Eurovision - 2012” müsabiqəsi başlananadək respublikada maraqlı arxitektura şedevrləri istifadəyə veriləcəkdir.
Bölmənin digər xəbərləri
