SİYASƏT
ÜMUMRUSİYA AZƏRBAYCANLILAR KONQRESİ MOSKVALI BÖYÜK VƏTƏN MÜHARİBƏSİ VETERANLARI ÜÇÜN BAYRAM TƏŞKİL ETMİŞDİR
Moskva, 7 may (AZƏRTAC). Moskvadakı “Baku” kino-konsert kompleksində Böyük Vətən müharibəsində Qələbənin 65-ci ildönümü münasibətilə tədbir olmuşdur. Ümumrusiya Azərbaycanlılar Konqresi (ÜAK) tərəfindən təşkil edilmiş görüşə Böyük Vətən müharibəsi veteranları, əmək cəbhəsinin tanınmış nümayəndələri, Moskva ictimaiyyətinin təmsilçiləri dəvət edilmişdi.
ÜAK rəhbərliyi adından çıxış edən icraçı direktor Eldar Quliyev müharibə iştirakçılarını Böyük Qələbə münasibətilə təbrik etmiş, faşizm üzərində qələbəyə Azərbaycanın və azərbaycanlıların töhfəsi barədə söhbət açmışdır. “Yedinaya Rossiya” partiyasının nümayəndələri, Moskvanın Şimal inzibati dairəsi üzrə bu partiyanın icraiyyə komitəsinin rəhbəri Vladimir Osipov, ÜAK-ın Moskva regional bölməsinin rəhbəri İlqar Hacıyev və başqaları da qonaqları salamlamışlar.
Rəsmi təbriklərdən sonra müharibə veteranları üçün konsert olmuş, sonra onlar nahara dəvət edilmişlər. Veteranlara Qələbənin 65 illiyi münasibətilə ÜAK-ın sifarişi ilə hazırlanmış xatirə medalları və Azərbaycanın rəmzi olan suvenirlər təqdim edilmişdir.
Veteranlar da öz növbəsində Azərbaycan diasporunun onlara diqqətinə və onların şərəfinə təşkil etdiyi bayrama görə dərin minnətdarlığını və təşəkkürünü bildirmişlər. Onlar qeyd etmişlər ki, bu, vaxtilə sovet xalqı adlanan bütün insanların ümumi bayramıdır.
Asya Hacızadə
AZƏRTAC-ın xüsusi müxbiri
Moskva