UŞAQ TEATRI “VƏTƏN” TAMAŞASINI TƏQDİM ETMİŞDİR
AZƏRTAC-ın müxbiri xəbər verir ki, Aktyor evində göstərilən bu tamaşaya dahi bəstəkarımız Üzeyir Hacıbəyovun musiqisi əsasında respublikanın əməkdar artisti Ayşad Məmmədov ideya və quruluş vermişdir. “Vətən” tamaşasında gənc aktyorlar çıxış edirlər: Bayrağın qırmızı rəngini Zaur Şirməmməd, göy rəngini Namiq Adiloğlu, yaşıl rəngini Samir Həşimli ifa edirlər.
Teatrın direktoru və bədii rəhbəri İntiqam Soltan demişdir ki, ”Körpəm” Eksperimental Uşaq Teatrının bazasında 2002-ci ildə yaradılan Uşaq Teatrının ilk məqsədlərindən biri dövlətimizin himni və bayrağı mövzusunu səhnələşdirmək olub. Əsərin ideya istiqamətində bir əsas süjet dayanır: bayrağın ayrı-ayrı rəngləri birləşəndə himn yaranır, bunlar ayrı düşəndə vətən də yox olur. Yəni tamaşada Vətəndən qaçanlara uşaq sözü ilə deyirik: axı hara gedirsiniz? Bəs bu Vətəni kimə qoyub gedirik? İstərdim ki, bütün Azərbaycan bu tamaşaya baxsın.
Teatrın həyatında əlamətdar hadisəyə çevrilən və onun uğuru sayılan tamaşanın gənc aktyorlarını tələbkar tamaşaçılar hərarətlə alqışlamışlar.
Bölmənin digər xəbərləri
