UŞAQ XOR KOLLEKTİVLƏRİNİN VI RESPUBLİKA MÜSABİQƏSİ QALİBLƏRİNİN YEKUN KONSERTİ
Bakı, 26 may (AZƏRTAC). Mayın 26-da Azərbaycan Dövlət Musiqili Komediya Teatrında Mədəniyyət və Turizm Nazirliyinin dəstəyi ilə keçirilən uşaq xor kollektivlərinin VI respublika müsabiqəsi qaliblərinin yekun konserti keçirilmişdir.
Tədbirdə çıxış edən mədəniyyət və turizm nazirinin müavini Sevda Məmmədəliyeva bildirmişdir ki, respublikamızda zəngin xor mədəniyyətini qoruyub saxlamaq və inkişaf etdirmək, uşaq musiqi və incəsənət məktəblərində xor fənninin tədrisinin səviyyəsini yüksəltmək, onlarda kiçik yaşlardan bu sənətə maraq oyatmaq, xormeysterlərin yaradıcılıq fəaliyyətini artırmaq məqsədi ilə altı ildir ki, uşaq xor kollektivlərinin respublika festival və müsabiqələri keçirilir. Bu yarışmalarda iştirak edən xor kollektivlərinin ifaçılıq səviyyəsi ildən-ilə yüksəlir. Respublikanın bütün rayon və şəhərlərindən xor kollektivlərinin iştirak etdiyi bu müsabiqələr yüksək səviyyədə təşkil edilir və əsl musiqi bayramına çevrilir.
Nazir müavini bildirmişdir ki, bu müsabiqə cari il aprelin 7-dən 29-dək zonalar üzrə - Bakı, Gəncə, Lənkəran, Naxçıvan, Sumqayıt, Şəki, Şirvan şəhərlərində keçirilmişdir. Müsabiqədə 10 mindən çox şagird iştirak etmişdir. Münsiflər heyətinin qərarı ilə fərqlənmiş xor kollektivləri, xormeyster və konsertmeysterlərə diplom, fəxri fərman və pul mükafatı təqdim edilmişdir.
Sonra müsabiqənin qalibləri geniş konsert proqramı ilə çıxış etmiş, tanınmış Azərbaycan bəstəkarlarının əsərlərini səsləndirmişlər.
Bölmənin digər xəbərləri
