ÜST: Ebola epidemiyası iki ay ərzində bitməyəcək
Bakı, 19 may, AZƏRTAC
Ümumdünya Səhiyyə Təşkilatının nümayəndəsi Ann Ansiya Konqo Demokratik Respublikasını bürüyən Ebola epidemiyasının uzun müddət davam edə biləcəyi barədə xəbərdarlıq edib.
AZƏRTAC xəbər verir ki, ÜST, həmçinin əvvəlki epidemiyanın iki il davam etdiyini qeyd edib.
“Bu epidemiyanın iki ay ərzində bitəcəyini düşünmürəm. Epidemiyanın miqyası bizim reaksiya sürətimizdən, infeksiyanın yayılmasını tez bir zamanda dayandırmaq qabiliyyətimizdən asılı olacaq. Bizim peyvəndimiz yoxdur və buna görə də əhalinin əməkdaşlığına ümid etməliyik”, - deyə ÜST-nin Konqo Demokratik Respublikasındakı nümayəndəsi mətbuata bildirib.
Ümumdünya Səhiyyə Təşkilatının Baş direktoru Tedros Adhanom Qebreyesusun sözlərinə görə, ÜST bu ölkələrdə Ebola virusuna 32 təsdiqlənmiş yoluxma və 500-dən çox şübhəli halı ilə bağlı məlumatlara sahibdir.
Qeyd edək ki, ABŞ Dövlət Departamenti Konqo Demokratik Respublikasında (KDR) və Uqandada Ebolanın yayılmasına qarşı mübarizə aparmaq üçün 13 milyon dollar ayırıb.
Bölmənin digər xəbərləri
