Vaşinqtonda keçirilən vebinarda Xəzər regionunda infrastruktur investisiyaları müzakirə olunub
Vaşinqton, 10 sentyabr, AZƏRTAC
Vaşinqtonda Xəzər regionunda iqtisadi siyasət və investisiyalara həsr olunmuş vebinar keçirilib.
AZƏRTAC xəbər verir ki, ABŞ-ın Beynəlxalq İnkişaf Agentliyinin dəstəyi ilə Xəzər Siyasi Mərkəzi tərəfindən təşkil olunan virtual forumda ABŞ Beynəlxalq İnkişaf Maliyyə Korporasiyasından, Avropa Yenidənqurma və İnkişaf Bankından xarici siyasət üzrə aparıcı ekspertlər, Əfqanıstan, Azərbaycan, Qazaxıstan, Türkiyə və Özbəkistanın yüksək vəzifəli nümayəndələri iştirak ediblər. Tədbirdə “Mavi nöqtələr şəbəkəsi” infrastruktur layihəsinin, Böyük Xəzər regionu ölkələrində infrastrukturun inkişafı üçün iqtisadi siyasət və nəticələrinin cari vəziyyəti müzakirə olunub. İngilis dilində rus dilinə sinxron tərcümə ilə yayımlanan veb-seminar Azərbaycan, Gürcüstan, Türkiyə, Qazaxıstan və Özbəkistanın ABŞ-dakı səfirlikləri ilə əlaqələndirilmiş şəkildə keçirilib.
Xəzər Siyasi Mərkəzinin icraçı direktoru Əfqan Nifti tədbiri açaraq deyib ki, “Mavi nöqtələr şəbəkəsi” layihəsi Xəzər regionuna bütün dünyada tərəfdaşların geniş dairəsini qurmağa və infrastruktur inkişafı sahəsində investisiyaların yönəldilməsi üçün həlledici rol oynaya bilər.
Müzakirələrdə ABŞ-ın Beynəlxalq İnkişaf Maliyyə Korporasiyasının Baş icraçı direktorunun müşaviri Kaleb Makkarri, missiya rəhbərinin müavini və Əfqanıstanın ABŞ-dakı səfirliyinin müvəqqəti işlər vəkili Əbdül Hadi Necrabi, Azərbaycanın İqtisadiyyat nazirinin müşaviri Emil Məcidov, Avropa Yenidənqurma və İnkişaf Bankının ABŞ-dakı nümayəndəliyinin icraçı direktoru C.Stiven Daud, Gürcüstanın ABŞ-dakı səfirliyinin missiya rəhbərinin müavini Georgi Tsikoliya, Azərbaycan Xarici İşlər Nazirliyinin İqtisadi əməkdaşlıq və inkişaf idarəsinin rəisi Hüsniyə Məmmədova, Qazaxıstanın “Astana” Beynəlxalq Maliyyə Mərkəzinin rəhbərinin müşavirləri Anar Ömərova və Əminə Turqulova, Özbəkistan İqtisadi İnkişaf və Yoxsulluğun Azaldılması Nazirliyinin Makroiqtisadi siyasət, təhlil və proqnozlaşdırma idarəsinin rəisi İlhom Umrzakov, Türkiyə Ticarət Nazirliyinin Beynəlxalq sazişlər və Avropa İttifaqı ilə sazişlər üzrə şöbəsinin baş direktor müavini Atilla Bastirmaçı, ABŞ-ın Azərbaycandakı sabiq səfiri və Xəzər Siyasi Mərkəzinin məsləhət şurasının üzvü Robert F.Sekuta iştirak ediblər.
“Mavi nöqtələr şəbəkəsi” layihəsi dünyada infrastruktur inkişaf layihələrini qiymətləndirən və sertifikatlaşdıran, güclü keyfiyyət standartlarının təşviqi üçün hökumətləri, özəl sektoru və vətəndaş cəmiyyətini bir araya gətirən çoxtərəfli təşəbbüsdür.
Azərbaycan İqtisadiyyat nazirinin müşaviri Emil Məcidov çıxışı zamanı son on beş ildə ölkədə çox sayda infrastruktur sərmayəsinin reallaşdırıldığını, bunun Azərbaycanın - Xəzər dənizi sahilində yerləşən, lakin okeana birbaşa çıxışı olmayan bir ölkənin - başqa ölkələrlə əlaqəni yaxşılaşdırmaq ehtiyacından qaynaqlandığını söyləyib. O, ölkə daxilində nəqliyyat əlaqələrinin yaxşılaşdırılması və Azərbaycanı daha böyük bazarlarla birləşdirən nəqliyyat marşrutlarının açılması lazım olduğunu deyib. Azərbaycan Xarici İşlər Nazirliyinin İqtisadi əməkdaşlıq və inkişaf idarəsinin rəisi Hüsniyə Məmmədova da öz növbəsində, geosiyasi baxımdan Xəzərdəki yeni təşəbbüslərin ABŞ və Azərbaycan arasındakı tərəfdaşlığa və bölgələrarası əməkdaşlığa əlavə təkan verə biləcəyini diqqətə çatdırıb.
AZƏRTAC-ın Vaşinqton bürosu
Bölmənin digər xəbərləri
