Velosipedçilərin avtomobil yolunun hərəkət hissəsində qaydaları pozması qəza riskini artırır
Bakı, 9 aprel, AZƏRTAC
Respublikamızın və paytaxtın avtomobil yollarında velosipedçilər yol hərəkəti qaydalarına ciddi əməl etməlidirlər. Velosipedçilərin avtomobil yolunun hərəkət hissəsində qaydaları pozması təhlükə yaradır və qəza riskini artırır.
Bu barədə məlumat Baş Dövlət Yol Polisi İdarəsinin velosipedçilərə çağırışında əks olunub.
“Yollarda xüsusi velosiped zolaqları olmadıqda velosipedçilər yolun, küçənin hərəkət hissəsinin kənarı və ya yol çiyinləri ilə hərəkət etməlidir. Velosipedçilər təhlükəsizlik dəbilqələrindən istifadə etməli, yol hərəkəti qaydalarını bilməli və yerinə yetirməli, xüsusilə yolun hərəkət hissəsində xaotik hərəkətlərdən çəkinməlidirlər.
Diqqətə çatdırırıq ki, velosipedçilər tərəfindən yol hərəkəti qaydalarına ciddi riayət edilməli, özlərinin və digər hərəkət iştirakçılarının təhlükəsizliklərinə məsuliyyətlə yanaşmalıdırlar. Qaydalara əməl etməyən velosipedçilər qanunvericiliyin tələblərinə uyğun olaraq inzibati qaydada məsuliyyətə cəlb ediləcəklər”, - deyə çağırışda qeyd olunub.
Bölmənin digər xəbərləri
