Vətən Müharibəsi Qəhrəmanı Anar Əliyevin xatirəsi daim qəlblərdə yaşayacaq
Bakı, 28 avqust, AZƏRTAC
Azərbaycanın bütövlüyü uğrunda fədakarlıqla döyüşmüş, uca şəhidlik məqamına qovuşmuş qəhrəmanlarımızın xatirəsi hər zaman ehtiramla yad edilir. Onların qəhrəmanlığı gələcək nəsillər tərəfindən də hər zaman uca tutulacaq.
Qırx dörd günlük Qələbəni bizə yaşadan qorxmaz igid oğullarımızdan biri də Vətən Müharibəsi Qəhrəmanı, şəhid polkovnik-leytenant Anar Əliyevdir.
Qəhrəmanımız 1980-ci il avqustun 28-də Kəlbəcər rayonunun Boyaqlı kəndində anadan olub. Kiçik yaşlarından hərbə böyük marağı olan Anar 1995-1997-ci illərdə Cəmşid Naxçıvanski adına Hərbi Liseydə, 1997-2001-ci illərdə isə Bakı Ali Birləşmiş Komandanlıq Məktəbində təhsil alıb. 2001-ci ildən Azərbaycan Silahlı Qüvvələrinin sıralarında xidmət edib. Elə həmin ildən Bakıdakı “N” saylı kəşfiyyat briqadasında leytenant kimi həqiqi hərbi xidmətə başlayıb. Şəhadətə ucalan günədək isə altı il xidmətini Naxçıvan Xüsusi Təyinatlılarının tərkibində davam etdirib.
Anar Əliyev 2008-ci ildə kapitan, 2012-ci ildə mayor, 2015-ci ildə vaxtından əvvəl polkovnik-leytenant rütbəsi alır. Beş dil bilən Azərbaycan Ordusunun yüksəkrütbəli zabiti mütəmadi olaraq xarici ölkələrdə kurslarda, təlimlərdə iştirak edib. 2019-cu ildə keçirilən xüsusi təyinatlılara rəhbərliyi Anar Əliyevə tapşırılan Beynəlxalq Qars təlimində Azərbaycan birincilik əldə edib. 2014-cü ildə Hərbi Akademiyanı bitirən Anar Əliyev müdafiə nazirinin əmri ilə Naxçıvan Muxtar Respublikasının Hərbi Komandanlığının sərəncamına göndərilir. Anar “N” saylı hərbi hissənin qərargah rəisi, sonra hərbi hissənin komandiri vəzifəsini icra edir. 2018-ci ildə Naxçıvan Əlahiddə Ümumqoşun Ordusunun əks-hücum əməliyyatı nəticəsində Günnüt kəndi, “Ağbulaq” yüksəkliyi, Qızılqaya və Qaraqaya dağları işğaldan azad olunur və nəticədə 11 min hektar ərazi düşməndən təmizlənir. A.Əliyev bu əməliyyatda yaxından iştirak edir və “Şücaətə görə” medalı ilə təltif olunur.
Naxçıvan Xüsusi Təyinatlılarının briqada komandiri Füzuli, Cəbrayıl, Zəngilan uğrunda döyüşərək uğurlar qazanıb
2020-ci il iyunun 13-də hərbi hissənin komandir müavini vəzifəsinə təyin olunan polkovnik-leytenant Anar Əliyev bu vəzifəni həmin il oktyabrın 17-dək icra edir. 2020-ci il sentyabrın 27-də başlanan Vətən müharibəsi zamanı Anar Əliyev Naxçıvan Əlahiddə Ümumqoşun Ordusunun xüsusi təyinatlı briqada komandiri idi. O, müharibənin ilk 13 günü Naxçıvanda xidmətdə olsa da, torpaqlarımızın yağı düşməndən azad olunmasında iştirak etmək üçün yuxarı komandanlığa müraciət edir. Azərbaycanın ərazi bütövlüyünün bərpası məqsədilə başlanan İkinci Qarabağ müharibəsi zamanı Xocavənd və Füzuli rayonlarının, habelə bu rayonların kəndlərinin, Şuşa şəhərinin azadlığı uğrunda gedən döyüşlərdə vuruşur. Qazandığı böyük təcrübə burada köməyinə çatır. Tabeliyində olan əsgərlərə uğurun necə əldə olunmasını aşılayır. Şuşa şəhərinin açarı hesab edilən “772” yüksəkliyinin götürülməsi, o qədər də asan məsələ deyildi. Lakin polkovnik-leytenant verilən döyüş tapşırığını uğurla yerinə yetirə bilir. Naxçıvan Xüsusi Təyinatlılarının briqada komandiri kimi Anar Əliyev Füzuli, Cəbrayıl, Zəngilan bölgələrində yüksəkliklər, yaşayış məntəqələrinin düşməndən təmizlənməsində özü və rəhbərlik etdiyi heyət döyüşərək uğurlar qazanır. Həmin döyüş əməliyyatları zamanı bir çox xüsusi təyinatlı tapşırıqların uğurla icrasında xüsusilə fərqlənib.
Xidməti dövründə A.Əliyevin göstərdiyi rəşadəti və qarşıya qoyulmuş döyüş tapşırığını yerinə yetirdiyində qəhrəmanlığı Prezident, Ali Baş Komandan İlham Əliyev tərəfindən yüksək qiymətləndirilib. Dövlət başçısının müvafiq sərəncamları ilə polkovnik-leytenant ölümündən sonra ən yüksək fəxri ad - “Vətən Müharibəsi Qəhrəmanı” adına və bir neçə döyüş medalına, o cümlədən “Vətən uğrunda” və “Şuşanın işğaldan azad edilməsi” medallarına layiq görülüb.
2020-ci il oktyabrın 21-də Anar Əliyev Xocavəndin Tuğ kəndində iki güllə yarası alaraq şəhadət zirvəsinə ucalıb. Vətən müharibəsi əfsanələrindən olan qəhrəmanımız İkinci Şəhidlər xiyabanında dəfn edilib. Gəncənin Gülüstan qəsəbəsindəki Kəlbəcər rayonu 2 nömrəli tam orta məktəbə onun adı verilib. Bundan başqa, Tərtər şəhərinin küçələrindən biri onun adını daşıyır. Nigar və Əli adlı iki övladı yadigar qalıb.
Azərbaycan Hərb Tarixi Muzeyində şəhidin əşyaları nümayiş olunur
Vətən Müharibəsi Qəhrəmanı şəhid Əliyev Anarın şəxsi əşyalarını 2021-ci ildə həyat yoldaşı Vüsalə Əliyeva Azərbaycan Hərb Tarixi Muzeyinə təqdim edib. Muzeyin sərgi zalında nümayiş olunan şəhidimizin şəkilləri, Fəxri fərmanları, “Əfsanəvi kəşfiyyatçı” adlı kitabı və polkovnik-leytenanta məxsus gündəlik hərbi geyim, telefonu, məğrur duruşlu şəkilləri muzeyə gələn qonaqlar tərəfindən böyük maraqla qarşılanır. Onun şərəfli və nümunəvi döyüş yolu gənc nəslin nümayəndələrinə çatdırılır. Tarix boyunca şəhidlik və qazilik ali ruhuna sahib olan xalqımızın mənliyində yaşayan iki uca əxlaqi keyfiyyət olub. “Ölərsən şəhid, qalarsan qazi” və bir də “Torpaq uğrunda ölən varsa, vətəndir” inamı onların şanlı zəfərlərinin sirri olub. Xalqımız Vətəni naminə həmişə döyüşüb, bu yolda ölməyi yaşamaqdan üstün tutub.
Qəhrəmanımız şərəfli həyat yolu keçib, vətənpərvər zabit kimi Vətənə qüsursuz xidmət, şücaət göstərib. İgidlər heç vaxt unudulmur. Dövlətimiz və xalqımız ana Vətənin azadlığı, müqəddəs torpağın şərəfi yolunda canını qurban verənləri daim qəlbində yaşadır, onları şərəf və qeyrət simvolu kimi xatırlayır. Qarabağ savaşı bir daha göstərdi ki, müstəqil Azərbaycan doğrudan da qəhrəmanlar diyarıdır.
Hazırda dövlətimiz tərəfindən şəhidlərimizin ailə üzvlərinə diqqət və qayğı göstərilir, eləcə də onların xatirələri qəlblərdə daim uca tutulur.
Bölmənin digər xəbərləri
