Bakı, 17 aprel, AZƏRTAC

Azərbaycan Respublikasının suverenliyi və ərazi bütövlüyü uğrunda 44 gün davam edən Vətən müharibəsində əsl qəhrəmanlıq nümunələri göstərərək, “dəmir yumruq”la erməni işğalçılarının başını əzməklə, düşməni diz çökdürən hərbi qulluqçularımızın şərəfli döyüş yolu diqqətlə öyrənilir və təbliğ edilir. Vətən uğrunda son damla qanınadək döyüşərək şəhidlik zirvəsinə ucalmış cəsur qəhrəmanlardan biri də gizir Abdullayev Sərxan Elxan oğludur.

AZƏRTAC xəbər verir ki, bu fikirlər Daxili İşlər Nazirliyinin Daxili Qoşunlarının “Əsgər” qəzetinin redaktoru, mayor Anar Əhmədovun şəhid Sərxan Abdullayev ilə bağlı məqaləsində yer alıb. Məqaləni təqdim edirik.

Gizir Sərxan Abdullayev 1988-ci il noyabrın 2-də Qazax şəhərində hərbçi ailəsində anadan olub. Elxan Abdullayevin və Surayə ananın böyüdüb tərbiyə etdiyi üç oğuldan biri olan Sərxan ailənin ilk övladı idi.

Orta təhsilini Qazax şəhərindəki Mehdi Hüseyn adına humanitar və təbiət fənləri üzrə məktəb-liseydə alan Sərxan Abdullayev müddətli həqiqi hərbi xidmətini 2007-ci ilin yanvarından 2008-ci ilin iyulunadək Daxili Qoşunların Bakıdakı “N” saylı hərbi hissəsinin komendant bölüyündə keçib. Qısa fasilədən sonra - 2008-ci ilin noyabrından Daxili Qoşunların Zaqatala rayonunda yerləşən “N” saylı hərbi hissəsinin xüsusi təyinatlı dəstəsində müddətdən artıq həqiqi hərbi xidmət hərbi qulluqçu kimi Vətən qarşısındakı borcunu yenidən yerinə yetirməyə başlayıb. Hərbçi kimi atasının yolunu davam etdirmək arzusunda olan Sərxan xidmət etdiyi dövrdə Daxili Qoşunların Orta İxtisas Hərbi Məktəbində (hazırda Daxili Qoşunların Ali Hərbi Məktəbi) təşkil olunan altı aylıq “Gizir hazırlığı kursu”nu bitirməyə müvəffəq olub. “Gizir” hərbi rütbəsində yenidən qoşunların Zaqataladakı “N” saylı hərbi hissəsində xidmətini davam etdirən S.Abdullayev 2013-cü ilin fevralından etibarən xüsusi təyinatlı dəstənin xüsusi həmlə qrupunda yarımqrup komandiri vəzifəsini şərəflə yerinə yetirib. Bununla yanaşı, Sərxan əsl xüsusi təyinatlıya xas olan yüksək döyüş hazırlığı və əzmkarlığı ilə qazandığı “Zoğalı beret”i də hər zaman böyük qürur hissi ilə daşıyıb.

Sərxan Abdullayev 2014-cü ilin sentyabrından dekabrınadək qardaş Türkiyənin Jandarm Baş Komandanlığının Jandarm Komando Məktəbləri və Təlim Mərkəzi Komandanlığında “Gizir komando təməl kursu”nu müvəffəqiyyətlə bitirib və ona müvafiq sertifikat verilib.

Nümunəvi yarımqrup komandiri kimi bilik və bacarığı sayəsində böyük rəislərin etimadını və tabeliyində olan şəxsi heyətin hörmətini qazanmağı bacarıb. Həmçinin xidmət etdiyi dövrdə yüksək döyüş hazırlığı və qüsursuz xidmətilə fərqlənən cəsur hərbi qulluqçumuz 3-cü dərəcəli “Qüsursuz xidmətə görə” medalı ilə təltif edilib, eləcə də hərbi hissə komandanlığı tərəfindən dəfələrlə mükafatlandırılıb.

Daxili Qoşunların “N” saylı hərbi hissəsində “Qartal” şərti adını daşıyan xüsusi təyinatlı dəstənin komandiri, “Zəfər” ordeni, “Şuşanın azad olunmasına görə” və “Şücaətə görə” medalları ilə təltif edilmiş mayor Sahib İbrahimov (Vətən müharibəsi zamanı Cəbrayıl rayonu ərazisində gedən döyüşdə yaralanıb) vaxtilə birgə xidmət etdiyi yarımqrup komandirinin nümunəvi xidmətini bu gün də böyük qürur hissi ilə qeyd edir: “Sentyabrın 27-dən başlayan və 44 gün davam edən Vətən müharibəsində dəstəmizin 5 nəfər hərbi qulluqçusu qəhrəmancasına vuruşaraq şəhid olub. Onlardan biri də öz igidliyi və vətənpərvərliyi, eləcə də Vətən müharibəsində Daxili Qoşunların ilk şəhidi kimi adını hərb tariximizə qızıl hərflərlə yazan yarımqrup komandiri gizir Sərxan Abdullayevdir.

Bir komandir kimi fəaliyyətinə gəlincə, deyə bilərəm ki, Sərxan ən bacarıqlı yarımqrup komandirlərindən biri olub. Qarşıya qoyulan bütün tapşırıqları vicdanla yerinə yetirib. Daxili Qoşunlar üzrə xüsusi təyinatlılar arasında keçirilən yarışlarda dəfələrlə dəstəmizi birinci yerə çıxarıb. Olduqca vətənpərvər, cəsur yarımqrup komandiri kimi şəxsi heyət üçün də hər zaman nümunə olub. Tabeliyindəki hərbi qulluqçulara qarşı tələbkarlığı ilə yanaşı, onlardan qayğısını da əsirgəməyib. Hər zaman şəxsi heyətin yanında olub. Elə döyüşdə də onları tək qoymadı.

İndiki kimi yadımdadır, sentyabrın 27-dən 28-ə keçən gecə, döyüşöncəsi Camışdağ silsiləsindən Ömər yüksəkliyi istiqamətinə keçid vaxtı 39 dərəcə hərarətinin olduğundan bizim təkidimizə baxmayaraq, Sərxan qəti şəkildə şəxsi heyətlə birgə hərbi əməliyyatlarda iştirak edəcəyini bildirdi və hərəkətə başladı. Bu vaxt mən onu yanıma çağırıb: “Sənin qızdırman var, xəstəsən, hərarətin yüksəkdir. Burda bizi gözlə, hələlik irəliyə getmə” dedim. Sərxan narazı halda: “Cənab mayor, dəstəmiz döyüşə gedir. Siz mənim yerimdə olsaydınız getməzdiniz?” deyə sual verdi. Mən cavabımda “Əlbəttə, mən getməliyəm” dedim. O da qəti şəkildə “Mən də getməliyəm. Mən də komandirəm. Mənim də şəxsi heyətim var”, deyə fikrini bitirdi və birinci qrupla birgə hərəkətini davam etdirdi. Bu vaxt hər birimiz onun necə vətənpərvər döyüşçü olduğunun bir daha şahidi olduq...”.

2020-ci il sentyabrın 28-də Kəlbəcər istiqamətində gedən döyüş Sərxanın sonuncu döyüşü oldu. Gizir Sərxan Abdullayevlə eyni qrupun tərkibində bu hərbi əməliyyatlarda yaxından iştirak etmiş “Qartal” xüsusi təyinatlı dəstəsinin cəsur hərbi qulluqçuları - baş çavuşlar Əlvan Hüseynov, Samir Yusibov, Rasim Tahirov və çavuş Şıxəli Məmmədovun qeyd etdikləri kimi, tabeliyində olan şəxsi heyətlə birgə döyüşə qatılan igid komandir ermənilərin xeyli sayda canlı qüvvəsini cəhənnəmə vasil edib. Lakin döyüşün gedişində düşmənin atdığı minaatan mərmisinin yaxınlıqda partlaması nəticəsində aldıqları çoxsaylı qəlpə yarasından gizir Sərxan Abdullayev və onunla birgə vuruşan Müdafiə Nazirliyinin “N” saylı hərbi hissəsinin müddətdən artıq həqiqi hərbi xidmət hərbi qulluqçusu əsgər Hakim Baxışov qəhrəmancasına şəhid olublar.

Gizir Sərxan Abdullayev 2020-ci il sentyabrın 28-də Qazax rayonunun Ağköynək kənd qəbiristanlığında dəfn olunub. Evli olan Sərxanın Orxan və Turan adlı iki oğlu var.

Azərbaycan Respublikası Prezidentinin 2020-ci il 15 dekabr və 29 dekabr tarixli sərəncamları ilə gizir Abdullayev Sərxan Elxan oğlu (ölümündən sonra) “Vətən uğrunda” və “Kəlbəcərin azad olunmasına görə” medalları ilə təltif edilib.

Şəhid gizirin atası Elxan Abdullayev Birinci Qarabağ müharibəsi veteranı, eyni zamanda, ehtiyatda olan gizirdir. Vətənpərvər ruhda böyüdüb tərbiyə etdiyi övladları ilə hər zaman qürur duyduğunu deyən Elxan Abdullayev bildirib: “Sərxan hərbi formanı səliqəli şəkildə elə geyinərdi ki, üzərində bir dənə də ləkə və qırışıq olmazdı. Hərbi formanı daşımaq onun üçün sanki toy-bayram idi, yəni, hərbçi peşəsini o dərəcədə sevirdi. Başqa cür ola da bilməzdi. Çünki o, gözünü açıb hərbi forma görmüşdü. Hərbçi peşəsinə bağlılıq onda uşaq yaşlarından yaranmışdı. Hələ kiçik yaşlarında olanda onu tez-tez özümlə hərbi hissəyə aparırdım. Qərargahda döyüş bayrağının yanında silahla dayanan əsgərə, şəxsi heyətə, silah və texnikalara diqqətlə baxırdı.

Sərxan olduqca vətənpərvər idi. Özünə təzə mobil telefon almışdı. Telefonunda ermənilərin Cıdır düzündə qol açıb rəqs etmələrinin videosunu izləməsi ona çox pis təsir etmişdi. Düşmənin bu mənfur hərəkətinə necə əsəbləşmişdisə, yeni aldığı telefonu divara çırpıb sındırmışdı. Bir ata kimi övlad itkisi mənim üçün nə qədər ağır olsa da, şəhid atası adını daşımaq bir o qədər qürurvericidir. Digər oğlum Elman da Vətən müharibəsi iştirakçısıdır. Övladlarımın vətənpərvərliyi ilə fəxr edirəm.

Qeyd edək ki, Sərxanın qardaşı Elman da hərbçidir. Kapitan hərbi rütbəsində olan Elman Abdullayev Azərbaycan Silahlı Qüvvələrinin zabiti kimi Vətən müharibəsində göstərdiyi qəhrəmanlıq və şücaətə görə Azərbaycan Respublikası Prezidentinin müvafiq sərəncamları ilə “Azərbaycan Bayrağı” ordeni, “Cəbrayılın azad olunmasına görə”, “Füzulinin azad olunmasına görə”, “Xocavəndin azad olunmasına görə” və “Zəngilanın azad olunmasına görə” medalları ilə təltif edilib. Bundan əlavə, şəhidimizin bibisi oğlu, Daxili Qoşunların Gəncədəki “N” saylı hərbi hissəsinin xüsusi təyinatlı dəstəsində müddətdən artıq xidmət edən əsgər Arif Tağıyev də Vətən müharibəsi qazisidir.

Prezident, Müzəffər Ali Baş Komandan İlham Əliyevin çıxışlarının birində şəhidlər barədə deyib: “Hər bir şəhid xalqın unudulmaz qəhrəmanıdır”. Vətən uğrunda qəhrəmancasına şəhidlik zirvəsinə ucalan Sərxan kimi oğullarımızın əziz xatirəsi xalqımızın qəlbində əbədi yaşayacaq. Allah bütün şəhidlərimizə rəhmət eləsin!