“Vikipediya”da “Türk marafonu” məqalə müsabiqəsi keçirilir
Bakı, 9 iyul, AZƏRTAC
“Vikipediya”da “Türk marafonu” məqalə müsabiqəsi keçirilir. Müsabiqə türkdilli xalqlarla bağlı məqalələrin yaradılması üçün nəzərdə tutulub. İyulun 31-dək davam edəcək müsabiqənin keçirilməsində məqsəd “Vikipediya”nın müxtəlif dil bölmələrində türkdilli xalqların mədəniyyəti, coğrafiyası, görməli yerləri haqqında məqalələr yaratmaqdır.
Bu barədə AZƏRTAC-a müsabiqənin Azərbaycan dili bölməsindəki təşkilatçısı Eldar Əzimov məlumat verib. O bildirib ki, müsabiqə Azərbaycan, türk, tıva, tatar, özbək və qazax dillərindəki “Vikipediya” layihələrində paralel keçirilir. Azərbaycan dilində “Vikipediya”da keçirilən müsabiqənin əsas məqsədi isə ölkəmiz istisna olmaqla, digər türkdilli xalqları və dövlətləri barədə məqalələrin yaradılmasıdır. Eyni ilə digər layihələrin iştirakçıları da öz doğma dilləri istisna olmaqla, digər iştirakçı ölkələr və xalqlar barədə məqalələr yaradacaqlar. Müsabiqə “Türkdilli vikimediyaçılar” istifadəçi qrupu tərəfindən təşkil olunub.
Marafonun əsas məqsədi dünyadakı türk xalqlarının, mədəniyyətinin və dilinin tam şəkildə işıqlandırılması, “Vikimedia” layihələrinə türk dillərini bilən yeni iştirakçıların cəlb edilməsi, könüllülər ilə əməkdaşlığın gücləndirilməsi və türkdilli xalqlar, yaşadıqları ölkələr və bölgələr haqqında məqalələr yazmaqdır. Müsabiqənin Azərbaycan dili bölməsindəki təşkilatçıları Azərbaycan dilində “Vikipediya” idarəçiləri Eldar Əzimov və Elgün Atalıyevdir.
Bölmənin digər xəbərləri
