VİSENTE DEL BOSKE: AZƏRBAYCANLA GÖRÜŞ BİZİM ÜÇÜN ƏHƏMİYYƏTLİDİR
Bakı, 8 iyun (AZƏRTAC). Azərbaycanla görüş əvvəlki oyunlardan fərqlənməyəcək. Bu oyun bizim üçün çox əhəmiyyətlidir.
Bunu İspaniya yığma futbol komandasının baş məşqçisi Visente del Boske bu gün keçirdiyi mətbuat konfransında bildirmişdir.
Baş məşqçi iyunun 9-da Azərbaycan komandası ilə yoldaşlıq görüşündə əsas məqsədin Konfederasiyalar Kuboku turnirində çıxış edəcək ispaniyalı futbolçuların hazırlıq səviyyəsini yoxlamaq olduğunu söyləmişdir. “Konfederasiyalar Kuboku turnirində bizim qrupdakı rəqiblərimizin oyun üslubu Azərbaycan yığmasının oyununa bənzəyir. Ona görə bu oyunla həmin turnirin keçiriləcəyi Cənubi Afrika Respublikasına aparacağımız heyəti müəyyənləşdirəcəyik. Məqsədimiz qələbə qazanmaqdır”.
Visente del Boske Azərbaycanla oyunun yoldaşlıq xarakteri daşımasına baxmayaraq, görüşə ciddi yanaşdıqlarını diqqətə çatdırmışdır. “Biz digər komandalarla görüşlərdə göstərdiyimiz oyunu Azərbaycan yığmasına qarşı da keçirəcəyik. Azərbaycan yığmasına qarşı oyun rahat olmayacaq. Çünki azərbaycanlı futbolçular hücuma meyilli və komanda oyun üslubu göstərməyi bacarırlar”.
Del Boske meydan sahiblərinin baş məşqçisi Berti Foqtsun ünvanına da xoş sözlər işlətmişdir. “Əlbəttə, Foqts alman futbolunun əfsanəsidir. Onu tanımamaq mümkün deyil”.
İspaniyalı mütəxəssis Azərbaycan yığması ilə görüşdə komandasının heyətində dəyişikliklərin olacağını da istisna etməmişdir. Baş məşqçi konkret olaraq «Barselonanın” yarımüdafiəçisi İniestanın oynaya bilməyəcəyini, onun əvəzinə heyətə 2 futbolçunun cəlb olunduğunu bildirmişdir.
Bölmənin digər xəbərləri
