Vüsal Abdullazadə: Karate-do fəlsəfəsinin əsasında “zor tətbiq etməmək” ideyası durur
Bakı, 7 yanvar, AZƏRTAC
Dünyada ən populyar idman növlərindən biri olan karate-do Azərbaycanda da kifayət qədər tanınır və sevilir. İdmanın bu növünə ölkəmizdə uşaq və gənclərin böyük maraq göstərməsi onun kütləviliyini və daha da geniş yayılmasını təmin edən əsas amillərdəndir. Karate-do döyüş sənətinin maraqlı fəlsəfəsi var.
Karate-do və hərbi döyüş çoxnövçülüyü üzrə üçqat dünya çempionu, Avropa çempionatının gümüş mükafatçısı, Bakı Karate-do Akademiyasının prezidenti, Dünya Fudokan Federasiyasının Azərbaycandakı rəsmi və səlahiyyətli nümayəndəsi, 5-ci Dan beynəlxalq qara kəmər ustası Vüsal Abdullazadə AZƏRTAC-a müsahibəsində idmanın bu növünün fəlsəfəsinin əsasında “zor tətbiq etməmək” ideyasınını durduğunu bildirib: “Karate-do” yapon mənşəli termin olub “kara” - “boş”, “te” - “əl”, “do” - “yol” deməkdir. “Karate” sözünün digər mənası “pis əməllərdən uzaq olan əl” deməkdir. Karate-do bir tərəfdən hörmət və məhəbbət, digər tərəfdən ədalət və sakitlik aşılayır. Karatenin əqidəsi “ilk hücum edən sən olma” prinsipidir. Karate-do özünü və digərlərini məcburi müdafiə vəziyyəti olmadan ondan istifadəni qadağan edən döyüş sənətidir. Bu idman növü çoxlarının bədənini, ruhunu möhkəmləndirərərk yeni bacarıqların və imkanların sərhədlərini genişləndirərək getdikləri həyat yoludur. Karate ilə məşğul olmaq insana yalnız zərbə vurmaq texnikası, müdafiə vəziyyətləri, döyüş strategiyasını deyil, eləcə də bəşəriyyətdəki qarşılıqlı əlaqəni duyaraq təbiətlə ahəngə cəhd etməsini öyrədir. Bu fəlsəfəyə görə, karateni ziyan vurmaq vasitəsi kimi yox (bu təbiətin harmoniyasını pozur), sizə və ya başqalarına zərər verənləri dayandırmaq imkanı verən vasitə kimi öyrədə bilərsiniz. Beləliklə, siz təbiətin ahəngini bərpa etmiş olursunuz”.
Vüsal Abdullazadə müasir karatenin şərti olaraq üç istiqamətdə - kütləvi idman karatesi (fiziki tərbiyə sistemini təqdim edir ki, bu da xüsusi idman keyfiyyətlərinin qorunmasına və inkişafına, hərəkət fəallığına xidmət edir), idman karatesi (idman döyüşündə məqsəd mümkün qədər zədələri azaltmaq və döyüşü baxımlı etməkdir), döyüş sənəti (əgər insan karate ilə məşğul olursa, onun öyrəndikləri cəmiyyət üçün faydalı olmalıdır) üzrə inkişaf etdiyini bildirib. O, karate fəndlərindən istifadənin təkcə baza texnikasına əsaslı şəkildə yiyələndikdən sonra mümkün olduğunu vurğulayıb: “İnsanın bütün hərəkətləri onun daxili aləminin, ruhunun əksidir. Karatedə üç həqiqətin qəbulu vacibdir. Bunlar qayda-qanun (məşq prosesi ciddi təşkil olunmalıdır), diqqət (məşqçinin göstərişlərinə diqqət etmək, artıq təcrübə əldə etmiş tələbələrin yüksək keyfiyyətlərinə nəzər yetirmək, döyüş zamanı zədələrdən qaçmaq) və özünütəhlildir (hər məşqi təhlil edərək karate-do məşqini həyat tərzinə çevirmək).
“Karate-do təzimlə başlayıb, təzimlə bitir”, - deyiminin məşhur olduğunu bildirən V.Abdullazadə idmanın bu növünün qanunlarının tələbələrdə şəfqət və hörmət tərbiyə etdiyini bildirib: “Karatedə davranışı müəyyən edən cəhətlər sədaqət, nəzakət, cəsarət, düzgünlük və sadəlikdir. Karate-do - karate qaydalarına görə, yarışlarda döyüş bitdikdən sonra qalib idmançı əgər öz sevincini hansısa jestlə ifadə edərsə, hakimlər tərəfindən məğlub elan edilir və qələbə onun rəqibinə verilir”.
Bölmənin digər xəbərləri
