Vyetnamda güclü daşqınlar 68 mindən çox evə ziyan vurub
Bakı, 21 noyabr, AZƏRTAC
Güclü daşqınlar Vyetnamın mərkəzində yerləşən Xanhoa, Zyalay və Daklak əyalətlərində 68 mindən çox evə ziyan vurub.
AZƏRTAC xəbər verir ki, təbii fəlakət nəticəsində 13 min hektar əkin sahəsi və 2 min 100 hektar meyvə plantasiyası ciddi zərər görüb, 30 mindən çox mal-qara və quş tələf olub. Ölkənin mərkəzində yağış və daşqın səbəbindən 1 milyondan çox insan elektriksiz qalıb.
Hakimiyyət orqanları daşqınların nəticələrini tez bir zamanda aradan qaldırmaq, təhlükəsizliyi təmin etmək və zərəri minimuma endirmək üçün bütün lazımi tədbirləri görür. Daşqın və sürüşmə riski yüksək olan ərazilərdən 61 mindən çox insan təxliyə edilib.
Vyetnam ordusunun 21 min hərbçisi və İctimai Təhlükəsizlik Nazirliyinin 42 min əməkdaşı əhaliyə yardım üçün zərər çəkmiş ərazilərə göndərilib. İnsanların təxliyəsi və təcrid olunmuş ərazilərə ərzaq və zəruri malların çatdırılması üçün helikopterlər, gəmilər və xüsusi texnika cəlb edilib. Daşqın ölkənin mərkəzi hissəsində və digər bölgələrlə avtomobil və dəmir yolu əlaqələrini ciddi şəkildə pozub. Əsas magistrallarda və əyalət yollarında kilometrlərlə uzanan tıxaclar yaranıb.
Qeyd edək ki, Vyetnamın mərkəzində miqyaslı daşqınlar nəticəsində 43 nəfər həlak olub, 9 nəfər isə itkin düşüb.
Bölmənin digər xəbərləri
