WUF13 Azərbaycanın şəhərsalma sahəsində əldə etdiyi uğurların beynəlxalq səviyyədə etirafıdır ŞƏRH
Bakı, 13 may, AZƏRTAC
Bakıda möhtəşəm hadisəsinin - Ümumdünya Şəhərsalma Forumunun 13-cü sessiyasının (WUF13) başlanmasına bir neçə gün qalır. Dünyanın hər yanından minlərlə nümayəndə mayın 17-dən 22-dək Azərbaycanın paytaxtına toplaşacaq. Bakı qonaqları, sadəcə, ev sahibi kimi deyil, həm də urbanistik transformasiyanın canlı və uğurlu modeli kimi qarşılayır. Birləşmiş Millətlər Təşkilatının bu forumu məhz ölkəmizdə keçirmək qərarı Azərbaycanın keçdiyi nadir inkişaf yolunun beynəlxalq səviyyədə etirafıdır.
Bu fikirləri AZƏRTAC-a açıqlamasında Milli Məclisin deputatı Kamran Bayramov deyib.
Onun sözlərinə görə, Qarabağın və Şərqi Zəngəzurun işğaldan azad edilməsindən sonra Azərbaycan miqyasına görə analoqu olmayan şəhərsalma layihələri həyata keçirir. “Biz dağıdılmış əraziləri xarabalıqlardan təmizləyərək, onları insanların rifahına xidmət edən müasir memarlıq incilərinə çeviririk. Bu mənada, Azərbaycanın qlobal memarlıq trendlərini diktə etdiyini söyləmək mübaliğə deyil, real faktın təsdiqidir. Azərbaycanın bu foruma hazırlığı hər bir detalı dəqiqliklə tənzimlənmiş saat mexanizmini xatırladır. Miqyasına görə WUF13 iki il əvvəl Bakıda keçirilmiş COP29 konfransını xatırlatsa da, burada əsas diqqət şəhərsalma, memarlıq və dayanıqlı məskunlaşma məsələlərinə yönəlib. Forumun əhatə dairəsi artıq paytaxt hüdudlarını aşaraq bütün respublikanı bürüyüb. Belə ki, Quba, Qəbələ, Gəncə, Mingəçevir, Şəki, Lənkəran, Xankəndi və Sumqayıtda silsilə festivallar, məlumatlandırma sessiyaları keçirilib, yekun nöqtə isə Bakı olacaq. Bu tədbirlər, sadəcə, maarifləndirmə xarakteri daşımır, ölkəmizin WUF13-ə nə qədər məsuliyyətlə yanaşdığının göstəricisidir. “Ağıllı kənd” və “Ağıllı şəhər” konsepsiyaları, möhtəşəm "Bakı Ağ Şəhər" layihəsi Prezident İlham Əliyevin rəhbərliyi ilə həyata keçirilən düşünülmüş şəhərsalma siyasətinin parlaq nümunələridir və məhz bu uzaqgörən liderlik sayəsində Azərbaycan dayanıqlı inkişafın ön sıralarında qərarlaşıb. Keçirilən festivalların əsas mesajı isə mürəkkəb urbanistik çağırışları sadə və əlçatan dildə geniş kütlələrə çatdırmaq idi. İnteraktiv oyunlar və müzakirələr vasitəsilə inklüziv şəhər mühiti, innovativ həllər və gələcəyin şəhərləri kimi mövzular cəmiyyətin diqqətinə təqdim olundu”, - deyə deputat əlavə edib.
Forumun həyati əhəmiyyət kəsb etdiyini söyləyən K.Bayramov vurğulayıb ki, dirçələn Qarabağ və Şərqi Zəngəzur müasir memarlıq ideyaları üçün nadir bir məkan olmaqla, bu gün müasir binalar, geniş küçələr və innovativ infrastrukturla “çiçəklənən bağ”a çevrilir: “Biz gələcəyin şəhərlərindən danışarkən mücərrəd anlayışları deyil, bizim və övladlarımızın 10, 20, 30 il sonra necə mühitdə yaşayacağını müzakirə edirik, şəhərlərin “canlı orqanizm” kimi insanların rahatlığına xidmət etməsini hədəfləyirik, yaşayış xərclərinin azaldılması, abad məhəllələrin və yaşıl zonaların salınması kimi qlobal mənzil böhranına qarşı innovativ həlləri araşdırırıq, mikromobillik, alternativ enerji mənbələri (Günəş, külək) və iqlimə davamlı infrastrukturun müasir meqapolislərin ayrılmaz hissəsinə çevrilməsini düşünürük”.
Deputat əlavə edib: “Şəhər təkcə divarlar deyil, həm də insanlardır. Azərbaycan bu gün Qərb ilə Şərqin, Şimal ilə Cənubun kəsişməsində bir quruculuq və tərəqqi körpüsüdür. İnfrastrukturun modernləşdirilməsi və yaşıl zonaların genişləndirilməsi onu deməyə tam əsas verir ki, Bakı 2026-cı ilin dünya urbanistika paytaxtı olmağa tam hazırdır. WUF13 Azərbaycanın bütün dünyaya səs salması üçün böyük bir şansdır, çünki yer kürəsində artıq "rahat şəhərlər cəmiyyəti" qurmağın vaxtı çatıb. Bir neçə gündən sonra Bakının qlobal inkişaf yollarının, şəhərsalma gündəminin müəyyən edildiyi mərkəzə çevrilməsi hər birimizi qürurlandırır. İnanırıq ki, bu qlobal missiya Azərbaycanın beynəlxalq nüfuzunu daha da yüksəklərə qaldıracaq”.
Bölmənin digər xəbərləri
