XARİCİ İŞLƏR NAZİRLİYİNDƏ GÖRÜŞ
Nazirliyin mətbuat mərkəzindən AZƏRTAC-a daxil olmuş məlumatda deyilir ki, ölkəmizə səfərindən məmnunluğunu söyləyən qonaq məcburi köçkünlərin düşərgələri və qəsəbələrində olduğunu, onların düşdüyü acınacaqlı vəziyyətdən təəssüfləndiyini bildirmişdir.
Azərbaycan ərazilərinin işğalı və bu ərazilərdə etnik təmizləmə siyasətinin həyata keçirilməsi nəticəsində 1 milyona qədər qaçqın və məcburi köçkünün meydana gəldiyini xatırladan nazir belə vəziyyətin təkcə ölkəmizin deyil, bütövlükdə regionun sabitliyi və inkişafına əngəl törətdiyini diqqətə çatdırmışdır. İşğalçı qoşunların zəbt edilmiş ərazilərdən çıxarılmasının, qaçqın və məcburi köçkünlərin öz doğma yurdlarına qaytarılmasının münaqişənin sülh yolu ilə həllində başlıca prinsiplərdən biri olduğunu deyən E.Məmmədyarov XXI əsrdə işğal faktının qəbuledilməz olduğunu xüsusilə vurğulamışdır. O, cəbhə xətti boyunca ermənilərin törətdiyi yanğınlar nəticəsində böyük ekoloji gərginlik yarandığını, işğal edilmiş ərazilərdə Ermənistan tərəfindən Cenevrə konvensiyasına zidd olaraq həyata keçirilən qeyri-qanuni məskunlaşdırma siyasətinin sülhə və qarşılıqlı etimad tədbirlərinə böyük əngəl olduğunu qeyd etmişdir.
Ölkəmizdə qaçqın və məcburi köçkünlərin sosial vəziyyətinin yaxşılaşdırılması istiqamətində görülən işlər və 2008-ci ilə qədər bütün qaçqın və məcburi köçkün düşərgələrinin ləğv edilməsi ilə bağlı Azərbaycan Prezidentinin qərarını qonaqların diqqətinə çatdıran nazir, bu istiqamətdə beynəlxalq qurumların yardımına hələ də ehtiyac olduğunu vurğulamışdır.
Cənab Antonio Quterreş ölkəmizdə, regionda və dünyada qaçqın və məcburi köçkün problemlərinin həllində Azərbaycanla sıx əməkdaşlığa hər zaman hazır olduğunu, bu işdə təmsil etdiyi qurumun maraqlı olduğunu bildirmişdir.
Görüşdə qarşılıqlı maraq doğuran bir sıra digər məsələlər ətrafında geniş fikir mübadiləsi aparılmışdır.
Bölmənin digər xəbərləri
