Xəzər İsayev: Prezident İlham Əliyev ölkəmizdə idmanın inkişafına böyük təkan verib
Bakı, 12 oktyabr, AZƏRTAC
“Müstəqillik dövründən əvvəl Azərbaycanda idman həyatı sönmüş vəziyyətdə idi. İnfrastruktur problem ilə yanaşı, idmançıların yarışlara, təlim və məşqlərə getmək imkanı da tam məhdudlaşmışdı. Çünki ölkəmizdə o dövrdə özbaşınalıq, anarxiya baş alıb getmişdi”.
Bu sözləri AZƏRTAC-a açıqlamasında Milli Olimpiya Komitəsinin (MOK) Ədalətli Oyunlar Komissiyasının sədri Xəzər İsayev İlham Əliyevin Azərbaycan Prezidenti seçilməsinin 20-ci ildönümü ilə bağlı danışarkən deyib.
O bildirib ki, 1993-cü ildə Ulu Öndər Heydər Əliyevin hakimiyyətə gəlişindən sonra idman sahəsində yeni sərəncamlar, fərmanlar imzalandı: “Bununla da, keçmiş dövrdən qalan, istifadəyə yararsız arenaların təmir olunması ilə bərabər, yeni idman komplekslərinin tikilməsi ilə bağlı müzakirələr aparıldı. Milli Olimpiya Komitəsi 1992-ci ildə yaradılsa da, həmin dövrdə qurum yox dərəcəsində fəaliyyət göstərirdi. Buna görə də ölkəmizin yüksək səviyyəli idmançıları, onların məşqçiləri, mütəxəssislər bir yerə cəmləşərək, komitənin prezidentinin dəyişilməsini və yeni rəhbərin seçilməsinə ehtiyac duyulduğunu bildirdilər. İdman ictimaiyyəti təkid etdi ki, komitənin prezidenti İlham Əliyev olsun. Nəhayət, 1997-ci ildə İlham Əliyev səs çoxluğu ilə Milli Olimpiya Komitəsinin rəhbəri seçildi”.
MOK rəsmisi Azərbaycanda idmanın inkişafında ölkə başçısının danılmaz rolu olduğunu vurğulayıb: “İlham Əliyev Milli Olimpiya Komitəsinin prezidenti seçildikdən sonra ölkəmizin dünya idmanında layiqli yer tutması üçün mühüm addımlar atıldı, yenidənqurma işləri başladıldı. İdman sahəsində infrastruktur problemi aradan qaldırıldı. Hər kəsə məlum olduğu kimi, hazırda Azərbaycanın 50-yə yaxın bölgəsində Olimpiya Kompleksləri mövcuddur. Biz Olimpiya Oyunlarında ilk dəfə İlham Əliyevin MOK prezidenti seçilməsindən sonra - 2000-ci ildə iştirak etdik. Onun ayağı idmanımız üçün çox düşərli oldu. “Sidney-2000” Yay Olimpiya Oyunlarında güləşçimiz Namiq Abdullayev və stend atıcımız Zemfira Meftahətdinova qızıl, boksçumuz Vüqar Ələkbərov isə bürünc medala layiq görüldü. Bu medallarla idmançılarımız unudulmaz uğura imza atdılar. Bundan sonra Olimpiya Oyunlarında nailiyyətlərimizin sayı daha da artdı və idmançılarımızın püxtələşməsi üçün vacib addımlar atıldı”.
X.İsayev 2015-ci ildə Bakıda keçirilmiş I Avropa Oyunlarının nəinki Azərbaycanda, dünya idman tarixində möhtəşəm hadisə kimi yadda qaldığını söyləyib: “IV İslam Həmrəyliyi Oyunlarının, Dünya Gənclər Festivalının, dünyada nüfuzlu “Formula” yarışlarının ölkəmizdə təşkili Prezidentin səyləri nəticəsində reallaşdı. Bunun nəticəsidir ki, Azərbaycanda idman növlərinin sayında da kəskin artım müşahidə olunur. İdmanda böyük nailiyyətlər İlham Əliyevin hakimiyyətə gəlişindən sonra daha da artdı. Əvvəlki illərdə beynəlxalq yarışlarda 5-6 idman növü ilə təmsil olunurduqsa, indi ən az 10-15 idman növündə mübarizə aparırıq. İdmançılarımız beynəlxalq arenada idmanın müxtəlif növlərində ölkəmizi təmsil edir, nailiyyətlər əldə edib hər birimizi sevindirirlər. Bu da idmanın inkişafına xüsusi diqqət yetirildiyinin bariz nümunəsidir. Tarix boyu hər kəs bunun şahidi olub ki, idmanımız gün keçdikcə daha da təkmilləşir”.
Güləş üzrə Avropa və dünya çempionu qeyd edib ki, pandemiya dövründən sonra da idmanla bağlı bir çox vacib qərarlar verilib: “Pandemiyayadək idmançılarımız istər ölkədaxili, istərsə də beynəlxalq yarışlarda kifayət qədər nailiyyət əldə edə bilmişdilər. Çünki müvafiq olaraq, hər idmançı öz işi ilə məşğul idi. Lakin pandemiyadan sonra idmançılara qadağalar qoyuldu və kütləviliyin qarşısı alındı. Bu kimi tədbirlər idmanımızda geriləməyə səbəb oldu. Amma Prezident İlham Əliyev bu geriləmənin qarşısını almaq üçün yeni addımlar atdı. Bu sayədə idmanımız yenidən dirçəldi. Şübhəsiz ki, “Paris-2024” Yay Olimpiya Oyunlarında da yaxşı nəticələr əldə olunacaq. Keyfiyyətli idmançı yetişdirmək heç də asan deyil və bunun üçün xeyli vaxt lazımdır. Bunun üçün Milli Olimpiya Komitəsi də kifayət qədər iş görür”.
X.İsayev Azərbaycanın gələcəkdə daha nüfuzlu yarışlara ev sahibliyi edə biləcəyini də istisna etməyib: “Gələcəkdə nəhəng yarışların Vətənimizdə keçiriləcəyinə şübhəm yoxdur. İnanıram ki, bu cür turnirlər Azərbaycanda baş tutsa, təşkilatçılıq ən yüksək səviyyədə olacaq”.
Bölmənin digər xəbərləri
