Xəzər Universitetində birinci Beynəlxalq psixologiya konfransı keçirilir
Bakı, 26 aprel (AZƏRTAC, Elvira Məmmədova). Aprelin 26-da Xəzər Universitetində birinci Beynəlxalq psixologiya konfransı işə başlamışdır.
AZƏRTAC xəbər verir ki, psixologiya üzrə təhsil alan tələbələrin və mütəxəssislərin iştirak etdikləri konfransı Xəzər Universitetinin təsisçisi, direktorlar və qəyyumlar şurasının sədri, professor Hamlet İsaxanlı açaraq Azərbaycanda bu mövzuda ilk dəfə keçirilən konfransın əhəmiyyətindən danışmış, onun işinə uğurlar arzulamışdır.
Tanınmış psixoloq, Azərbaycan Psixiatriya Assosiasiyasının prezidenti, tibb üzrə elmlər doktoru Nadir İsmayılov diqqətə çatdırmışdır ki, Azərbaycanda bu sahə üzrə mütəxəssislərə böyük ehtiyac duyulur. Psixoloqların sayı tibb müəssisələrində fəaliyyət göstərən psixiatrların sayına bərabər olmalıdır. Çünki hər bir xəstənin tibbi psixoloqa ehtiyacı vardır. Biz bu sahəni inkişaf etdirməli və bu ixtisas üzrə çoxlu mütəxəssislər yetişdirməliyik.
Sonra türkiyəli psixoloqlar Mehmet Şakiroğlu və Ozanser Uğurlu həmmüəllifləri olduqları “Aşkın psikolojisi” (“Sevginin psixologiyası”) kitabının təqdimatını keçirmişlər.
Konfransda, həmçinin Sibel Usluer Erenel “Uşaq istismarı və şiddətə məruz qalmış uşaq”, Sevilay Zorlu “Koqnitiv davranış terapiyası” və Aysun Tulay Bozkurt “Pozitiv psixologiya” mövzularında məruzə ilə çıxış etmişlər.
İki gün davam edəcək tədbirdə Türkiyənin tanınmış psixoloqlarının məruzələri dinləniləcək, müzakirələr aparılacaqdır.
Konfransın ikinci günündə iştirakçılara təlim xarakterli seminarlar da təşkil olunacaqdır.
Bölmənin digər xəbərləri
