Xəzər və Suraxanı rayonlarında iki küçə əsaslı şəkildə təmir edilib
Bakı, 18 mart AZƏRTAC
Paytaxtın Xəzər və Suraxanı rayonları ərazisində Azərbaycan Avtomobil Yolları Dövlət Agentliyi tərəfindən kompleks tədbirlər həyata keçirilir. Sözügedən rayonların Binə qəsəbəsi və Südçülük sovxozu yaşayış massivində 2 küçənin əsaslı şəkildə təmiri artıq yekunlaşdırılıb.
Agentliyinin İctimaiyyətlə əlaqələr şöbəsindən AZƏRTAC-a bildirilib ki, təmir işlərinin aparıldığı Xəqani və Elmir Orucov küçələrində zəruri yerlərdə deformasiyaya uğramış yararsız qrunt çıxarılıb, əks dolğu işləri aparılmaqla kipləşdirmə işləri görülüb, küçələr profilə salınıb, optimal qum-çınqıl qarışığından yol əsası işlənilib və asfaltlanma işləri aparılıb.
Uzunluğu 370 metr, eni isə 6 metr olan Xəqani küçəsinin təmiri zamanı, ilk növbədə, çirkli gölməçələrin qurudulması və küçəboyu müvafiq təmizləmə işlərinin aparılması həyata keçirilib. Daha sonra tərtib olunmuş qrafikə uyğun və texnoloji ardıcıllıqla aparılan təmir-tikinti işləri çərçivəsində lazımi materialdan istifadə edilərək 20 santimetr qalınlığında yeni yol yatağı, optimal-qırmadaş qarışığından isə yol inşası işləri aparılıb. Küçəyə yeni asfalt-beton örtüyü döşənib.
Təmir edilən E.Orucov küçəsinin uzunluğu 790 metr, ortalama eni isə 6 metrdir. Yenidənqurma işləri çərçivəsində küçəboyu yararsız qrunt çıxarılıb, əvəzinə yararlı material tökülərək kipləşdirilib və yeni yol yatağı hazırlanıb. Sonra isə əsasın alt layı karxana çınqılı, üst layı isə qum-qırmadaş qarışığından istifadə edilərək tikilib və yeni asfalt-beton örtüyü döşənib.
İlk növbədə, örtüyünün vəziyyəti qənaətbəxş olmayan, həmçinin torpaq əsaslı və çınqıl örtüklü olan qəsəbədaxili küçə və yollarda təmir-bərpa işləri həyata keçirilir.
Xəzər və Suraxanı rayonlarında təmir-bərpa işlərinin görüldüyü küçələr vətəndaşların əsas istifadə etdiyi yollar olduğu üçün bu işlərin aparılması gediş-gəlişin rahatlaşmasına gətirib çıxaracaq.
Növbəti mərhələlərdə sözügedən rayonlar üzrə digər küçə və yollarda da təmir işlərinin aparılması nəzərdə tutulur.
Bölmənin digər xəbərləri
