Xəzərin səviyyəsinin azalması ilk növbədə iqlim faktoru ilə əlaqəlidir
Bakı, 2 sentyabr, AZƏRTAC
Xəzər dənizinin səviyyə tərəddüdü aktual məsələ olaraq qalır. Son müşahidələr göstərir ki, Xəzər dənizinin səviyyəsi azalmaqda davam edir. 2005-ci ildən bu yana dənizin səviyyəsinin təxminən 20 santimetr azalması müşahidə olunub.
AZƏRTAC xəbər verir ki, bunu Xəzər Kompleks Ekoloji Monitorinq İdarəsinin rəisi Nazim Mahmudov Ekologiya və Təbii Sərvətlər Nazirliyinin feysbuk səhifəsində yayımlanan “Ekspert saatı”nda deyib.
Onun sözlərinə görə, Xəzərin səviyyəsinin azalması ilk növbədə iqlim faktoru ilə əlaqəlidir: “Məlum olduğu kimi bütün dünyada qlobal istiləşmə baş verir və bu təsir Xəzər dənizindən də yan ötməyib. Xəzər dənizi qapalı su hövzəsidir və onun su balansını dənizə axan transsərhəd çayları formalaşdırır. Həmin çayların gursululuğu da azalmağa doğru gedir. Nəticədə Xəzərə daxil olan suların azalması onun səviyyəsinin enməsinə gətirib çıxarır. Digər faktor kimi dənizin geomorfoloji quruluşunu nəzərə alsaq, tektonik plitələrin hərəkəti səviyyənin azalmasına müəyyən qədər təsir edir. Eyni zamanda, dəniz üzərində olan atmosfer havasının sirkulyasiyası da səviyyənin enməsində rol oynayır. Ümumilikdə səviyyə tərəddüdləri iqlim amili ilə əlaqəlidir”.
Bölmənin digər xəbərləri
