XI Bakı Beynəlxalq Kitab Sərgisində maarifləndirici və yaradıcı görüşlər keçirilib
Bakı, 4 oktyabr, AZƏRTAC
Bakı Ekspo Mərkəzində keçirilən XI Bakı Beynəlxalq Kitab Sərgisinin üçüncü günündə Respublika Uşaq Kitabxanası zəngin və rəngarəng tədbirlər proqramı ilə müxtəlif fəaliyyətlər təşkil edib.
AZƏRTAC xəbər verir ki, tədbirlər çərçivəsində Türkiyədən dəvət olunmuş uşaq yazarı və nağılçı Sema Yaylı ilə görüş baş tutub. Görüşdə "Modern School", 172 və 11 saylı tam orta məktəblərin şagirdləri iştirak ediblər. Nağıl saatında yazar uşaqlara türk ədəbiyyatına dair maraqlı nümunələr təqdim edib, öz qələm məhsulları olan “Ejderya”, “Kapıların ardındakı”, “Karar Dağları” və “Origamili masallar – Kurbağa Alkara” kitablarını tanıdıb. Yazıçı, həmçinin məşhur “Kəloğlan” nağılını musiqili formada səsləndirərək uşaqların marağına səbəb olub. Daha sonra Sema Yaylı origami sənəti üzrə ustad dərsi keçirib. Uşaqlara bu sənətin incəliklərini izah edən yazıçı onlarla birlikdə kağızdan müxtəlif fiqurlar hazırlayıb.
Tədbirin sonunda şagirdlərə “Göy Qurşağı” uşaq jurnalı hədiyyə edilib.
Sərginin davamında Azərbaycan uşaq yazıçıları Sevinc Nuruqızı və Solmaz Amanova ilə oxu saatı təşkil olunub. Oxu saatının ilk mərhələsində S. Nuruqızının general-mayor Həzi Aslanovun xatirəsinə həsr etdiyi “Salam, İnnab ağacı” kitabının təqdimatı keçirilib. Təqdimatda yazıçı kitabdan seçilmiş fraqmentləri səsləndirib, şagirdlərlə birgə müzakirələr aparıb. Tədbirin sonunda uşaqlara imzalı kitablar hədiyyə olunub.
Oxu saatının növbəti mərhələsi yazıçı Solmaz Amanova ilə davam edib. Şagirdlər müəllifin “Yaşıl portal” kitabı ilə tanış olublar. 5 nömrəli Uşaq-Gənclər İnkişaf Mərkəzinin şagirdləri isə yazarın “Zəfəran” əsərini səhnələşdirərək maraqlı tamaşa nümayiş etdiriblər.
Sərginin növbəti mərhələsində uşaqların yaradıcı bacarıqlarının inkişafına yönəlmiş master-klas təşkil olunub. Master-klasa Bakı şəhəri 1 nömrəli Uşaq-Gənclər İnkişaf Mərkəzinin sağlamlıq imkanları məhdud uşaqları cəlb olunublar. Uşaqlar gildən hazırlanan fiqurların rənglənməsi prosesində fəal iştirak ediblər.
Ümumilikdə, Respublika Uşaq Kitabxanasının təqdim etdiyi bu tədbirlər uşaqların həm intellektual, həm də yaradıcılıq bacarıqlarının inkişafına töhfə verib və sərginin ən maraqlı məqamlarından birinə çevrilib.
Bölmənin digər xəbərləri
